Украина президенті Владимир Зеленский Әзербайжан президенті Ильхам Әлиевке телефон соқты, деп хабарлайды "Адырна" ұлттық порталы.
Екі жақты байланыс барысында Зеленский Екатеринбург қаласында әзербайжандықтарға жасалған шабуыл кезінде қаза тапқан Әзербайжан азаматтарының өліміне байланысты украин халқы атынан көңіл айтты. Әлиев бұл сөз үшін алғысын білдірді.
Сондай-ақ Зеленский Әзербайжан тарапына Ираннан Украина азаматтарын эвакуациялау барысында көрсеткен көмегі үшін ризашылығын жеткізді.
Келіссөз барысында тараптар екі ел арасындағы ынтымақтастықты дамыту мәселелерін, соның ішінде Баку қаласында үкіметаралық комиссияның жақын арада өтетін отырысын ұйымдастыруды талқылады.
Әзербайжан мен Украина көшбасшылары өзара аумақтық тұтастық пен егемендікті қолдайтындарын тағы да нақтылады.
Сонымен қатар Украина президенті Әзербайжанның еліне көрсетіп жатқан гуманитарлық көмегі үшін ризашылығын білдірді. Тараптар екіжақты серіктестікті одан әрі нығайтуға ниетті екенін атап өтті.
