Маңғыстау облысының Жаңаөзен қаласында жол-көлік оқиғасы тіркелді. Жүргізуші куәлігі жоқ азаматтың кесірінен болған апат салдарынан бірнеше адам ауруханаға жеткізілді, деп хабарлайды “Адырна”.
Жол апаты Жаңаөзендегі өндірістік жерде, Асау Барақ көшесіндегі «Hyundai» авто орталығының маңында болған. Алдын ала мәліметтер бойынша, қақтығысқа басып озу әрекеті себеп болған.
Chevrolet Cobalt және Toyota Hilux көліктері соқтығысқан.
“Chevrolet маркалы көліктің жүргізушісі басып озуға тырысып, қарсы бағыттағы көлікке соғылған.
Тексеру барысында Chevrolet Cobalt көлігін тізгіндеген азаматтың жүргізуші куәлігі жоқ екені анықталды”, делінген хабарламада.
Апат салдарынан төрт адам медициналық көмекке жүгінді.
Chevrolet Cobalt көлігінің жүргізушісі мен екі жолаушысы түрлі дене жарақаттарымен травматология және жансақтау бөлімдеріне жатқызылды.
Toyota Hilux көлігінде болған бір жолаушы дәрігерлік тексерістен кейін үйіне қайтты.
Қазіргі уақытта полиция оқиғаның мән-жайын анықтау үшін қосымша тексеру жұмыстарын жүргізіп жатыр.
