Атырау облысы Махамбет ауданындағы Сарайшық ауылының тұрғындары референдумға белсенді қатысуда. Тарихи Сарайшық – қазақ даласындағы маңызды саяси және мәдени орталықтардың бірі, Қазақ хандығы дәуірінде ел тағдырына қатысты маңызды шешімдер қабылданған киелі мекен ретінде белгілі.
Тарихи деректерге сәйкес, осы өңірде Қасым хан билік құрған, сондай-ақ қазақтың алғашқы құқықтық жүйелерінің бірі саналатын «Қасым ханның қасқа жолы» заңдары қалыптасқан.
Бүгінде көне Сарайшықтың тұрғындары дауыс беру учаскелеріне келіп, ел болашағына қатысты маңызды шешім қабылдау үдерісіне өз үлестерін қосуда.
Сарайшық мемлекеттік тарихи-мәдени музей-қорығының директоры Абилсейіт Мұхтар бұл күннің символдық маңызы ерекше екенін атап өтті.
«Сарайшық – қазақ мемлекеттілігінің қалыптасуында маңызды рөл атқарған тарихи мекен. Осындай қасиетті жерде тұратын халықтың бүгінгі маңызды саяси оқиғаға қатысуы – өткен мен бүгіннің сабақтастығын көрсетеді. Бұл – тарих пен қазіргі уақытты байланыстыратын маңызды қадам», – деді ол.
Жергілікті тұрғындардың айтуынша, дауыс беру – ата-бабалар аманатына адалдық танытып, ел болашағына бейжай қарамайтын азаматтық жауапкершіліктің көрінісі.
