اتىراۋ وبلىسى ماحامبەت اۋدانىنداعى سارايشىق اۋىلىنىڭ تۇرعىندارى رەفەرەندۋمعا بەلسەندى قاتىسۋدا. تاريحي سارايشىق – قازاق دالاسىنداعى ماڭىزدى ساياسي جانە مادەني ورتالىقتاردىڭ ءبىرى، قازاق حاندىعى داۋىرىندە ەل تاعدىرىنا قاتىستى ماڭىزدى شەشىمدەر قابىلدانعان كيەلى مەكەن رەتىندە بەلگىلى.
تاريحي دەرەكتەرگە سايكەس، وسى وڭىردە قاسىم حان بيلىك قۇرعان، سونداي-اق قازاقتىڭ العاشقى قۇقىقتىق جۇيەلەرىنىڭ ءبىرى سانالاتىن «قاسىم حاننىڭ قاسقا جولى» زاڭدارى قالىپتاسقان.
بۇگىندە كونە سارايشىقتىڭ تۇرعىندارى داۋىس بەرۋ ۋچاسكەلەرىنە كەلىپ، ەل بولاشاعىنا قاتىستى ماڭىزدى شەشىم قابىلداۋ ۇدەرىسىنە ءوز ۇلەستەرىن قوسۋدا.
سارايشىق مەملەكەتتىك تاريحي-مادەني مۋزەي-قورىعىنىڭ ديرەكتورى ابيلسەيىت مۇحتار بۇل كۇننىڭ سيمۆولدىق ماڭىزى ەرەكشە ەكەنىن اتاپ ءوتتى.
«سارايشىق – قازاق مەملەكەتتىلىگىنىڭ قالىپتاسۋىندا ماڭىزدى ءرول اتقارعان تاريحي مەكەن. وسىنداي قاسيەتتى جەردە تۇراتىن حالىقتىڭ بۇگىنگى ماڭىزدى ساياسي وقيعاعا قاتىسۋى – وتكەن مەن بۇگىننىڭ ساباقتاستىعىن كورسەتەدى. بۇل – تاريح پەن قازىرگى ۋاقىتتى بايلانىستىراتىن ماڭىزدى قادام»، – دەدى ول.
جەرگىلىكتى تۇرعىنداردىڭ ايتۋىنشا، داۋىس بەرۋ – اتا-بابالار اماناتىنا ادالدىق تانىتىپ، ەل بولاشاعىنا بەيجاي قارامايتىن ازاماتتىق جاۋاپكەرشىلىكتىڭ كورىنىسى.
