Ұлыбритания қазақстандық мұнаймен операциялар жүргізуге, оның ішінде Ресей аумағы арқылы транзитпен тасымалдауға мүмкіндік беретін арнайы лицензия берді. Бұл туралы Tengrinews.kz хабарлайды. Лицензияны Ұлыбритания Қаржы министрлігінің Қаржылық санкцияларды іске асыру басқармасы (OFSI) берген, деп хабарлайды "Адырна".
Экономика немесе халықаралық сауда үшін қажет болған жағдайда, қолданыстағы санкцияларға қарамастан жекелеген операцияларды жүргізуге мүмкіндік беретін бас лицензияларды дәл осы OFSI бере алады.
Құжатқа сәйкес, қазақстандық мұнайды жеткізуге, сатып алуға, тасымалдауға және жеткізіп беруге байланысты операцияларға, соның ішінде төлемдерді жүргізуге рұқсат етіледі.
Бұл ретте басты шарттар бар:
- мұнай Қазақстаннан шыққан болуы тиіс;
- ол Ресеймен байланысы бар тұлғаларға тиесілі болмауы керек;
- мұнайдың Ресей аумағында тиелуіне, жөнелтілуіне немесе сол ел арқылы транзитпен өтуіне жол беріледі.
Іс жүзінде бұл аталған талаптар сақталған жағдайда, қазақстандық мұнайды Ресей инфрақұрылымы арқылы тасымалдау санкциялық шектеулерге жатпайтынын білдіреді.
Лицензияда ресейлік "Транснефть" компаниясы мен оның еншілес құрылымдары санкцияда болғанына қарамастан, рұқсат олардың қатысуымен өтетін операцияларға да қолданылатыны бөлек көрсетілген. Бұл өте маңызды, себебі қазақстандық мұнайдың едәуір бөлігі дәл осы ресейлік құбырлар арқылы экспортталады.
Ұлыбританиялық қаржы ұйымдарына мұндай мәмілелер бойынша төлемдерді өңдеуге рұқсат берілді. Сонымен қатар, барлық қатысушы операциялар бойынша толық құжаттаманы кемінде алты жыл бойы сақтауға міндетті. Лицензияның санкцияларды жалпылама түрде жоймайтыны және тек қатаң белгіленген шарттар аясында ғана әрекет ететіні ерекше атап өтілген.
Лицензия санкцияларды толық алып тастамай, тек нақты шарттар бойынша ғана әрекет етуге мүмкіндік береді. Қазақстан үшін бұл өте маңызды, өйткені мұндай рұқсаттарсыз жеткізілімдер санкциялық шектеулерге ілінуі мүмкін еді. Лицензия 2026 жылғы 19 наурыздан бастап күшіне енеді және 2028 жылғы 18 наурызға дейін жарамды.
