Садыр Жапаров Қырғызстан азаматтығын қабылдау, одан шығу және азаматтықтан айыру туралы жарлыққа қол қойды. Бұл туралы республика басшысының баспасөз қызметі мәлімдеді, деп хабарлайды “Адырна”.
Берілген мәліметтерге сәйкес, 127 адам (оның ішінде 7 бала) азаматтықтан шыққан, ал 484 адам (оның ішінде 24 бала) азаматтығын жоғалтқан. Сонымен қатар, 893 адам (137-сі балалар) Қырғызстан азаматтығын алған.
Азаматтық алғандардың басым бөлігін тарихи отанына оралған этникалық қырғыздар, сондай-ақ азаматтығын қайта қалпына келтіріп жатқан тұлғалар құрайды. Бұған қоса, «Беларусь Республикасы, Қазақстан Республикасы, Қырғыз Республикасы және Ресей Федерациясы арасындағы азаматтықты жеңілдетілген тәртіппен алу туралы келісімді ратификациялау туралы» заң аясында да азаматтық алғандар бар.
Сонымен бірге, Қырғызстан Сыртқы істер министрлігі шетел азаматтарының ел аумағында болу тәртібі туралы ережеге өзгерістер енгізілгенін хабарлады. Атап айтқанда, этникалық қырғыздар мен олардың отбасы мүшелерінің құқықтық мәртебесін реттейтін арнайы норма енгізілді. Осыған сәйкес, уақтылы рұқсат құжаттарын рәсімдемеген адамдарға Қырғызстан аумағына бір реттік кіруге және 30 жұмыс күні ішінде өздерінің құқықтық мәртебесін заңдастыруға мүмкіндік беріледі.
Бұған дейін, 2025 жылы Қырғызстан азаматтары деп танылуы мүмкін тұлғалар шеңберін кеңейтетін, сондай-ақ азаматтықтан айыру негіздерінің тізімін толықтыратын түзетулер қабылданған болатын.
