Өзбекстан сенаты азаматтардың аты-жөнін рәсімдеуге қатысты өзгерістер енгізуді көздейтін заңды мақұлдады, деп хабарлайды "Адырна" тілшісі.
Құжатқа сәйкес, енді балаға әкесінің атын тегі ретінде беруге мүмкіндік жасалады.
Қолданыстағы тәртіп бойынша баланың тегі ата-анасының тегіне қарай анықталады. Сонымен қатар ұлттық дәстүрлерге сәйкес, әкесі немесе анасының шешімімен баланың атасының аты балаға тегі ретінде берілуі мүмкін.
Заңға енгізілген өзгерістер баланың әкесінің атын да тегі ретінде рәсімдеуге мүмкіндік береді.
Сенаторлардың айтуынша, бұл өзгеріс азаматтарға қосымша қолайлылық жасап, олардың қалауын ұлттық және діни дәстүрлерді ескере отырып жүзеге асыруға мүмкіндік береді.
Бұдан бөлек, заңда кәсіпкерлік қызметке қатысты «Лицензиясыз бизнес жүргізу» атты жаңа құқықтық институт енгізу қарастырылған. Оның аясында кәсіпкерлерге кейбір қызмет түрлерін лицензия немесе рұқсат алмай, үш айға дейін жүзеге асыруға мүмкіндік беріледі.
Кәсіпкерлік субъектілері уәкілетті органға электронды түрде хабарлама жіберу арқылы өз қызметін бастай алады. Оларға қызметін лицензиялық және рұқсат беру талаптарына сәйкестендіруге қосымша уақыт беріледі. Сондай-ақ кәсіпкерлер жұмысын сынақ режимінде бастап, оның экономикалық тиімділігін бағалай алады.
Сонымен қатар заң аясында «Архив ісі туралы» заңға да өзгерістер енгізіледі. Атап айтқанда, архив саласындағы уәкілетті мемлекеттік органдардың өкілеттіктері нақтыланып, мемлекеттік емес және электронды архивтерді ұйымдастыру тәртібі белгіленеді. Бұдан бөлек, архив құжаттарын ведомстволық архивтерде уақытша сақтау мерзімдері реттеледі.
