Журналист Динара Егеубаева өз автокөлігімен басып кеткен велосипедшінің адвокаты алғаш рет аталған іс бойынша көпшілік алдында пікір білдірді.
Данияр Баянбаевтың мүддесін қорғайтын заң консультанты Бақыт Жарқынбековтың айтуынша, оның қоғамға үндеу жасауына әлеуметтік желілерде велосипедшінің өзі жол-көлік оқиғасын әдейі ұйымдастырды деген ақпардың таралуы себеп болған.
«Осы уақытқа дейін қылмыстық істі қоғамдық талқыға салғым келмеді. Тергеу бар, заңда белгіленген тәртіп бар. Бірақ қоғамдық кеңістікте жәбірленушіге жала жауып, ол жол-көлік оқиғасын өзі әдейі арандатты деген сөздер айтыла бастағанда, үнсіз қалу мүмкін емес», – деді Бақыт Жарқынбеков.
Жәбірленуші тараптың айтуынша, Динара Егеубаева өзінің медиадағы танымалдығын пайдаланып, болған оқиғаның өзіне тиімді нұсқасын алға тартып отыр. Бұл нұсқаны кейбір журналистер мен блогерлер де қолдап, таратып жатыр. Атап айтқанда, қоғамдық кеңістікте велосипедші өзі соқтығысқаны, тіпті, жол-көлік оқиғасын қолдан жасады деген пікірлер айтылып жүр.
Адвокат мұндай нұсқаның негізі жоқ деп санайды және ең алдымен жол-көлік оқиғасының нақты мән-жайы мен тергеу нәтижелеріне сүйенуге шақырады. Оның айтуынша, жол апатынан кейін Данияр Баянбаев ауыр хәлде ауруханаға жеткізілген. Оған жабық бас-ми жарақаты, бірнеше сүйектің сынуы және басқа да дене жарақаттары диагнозы қойылған.
«Сонда адам өз басын қатерге тігіп, өзін жарақаттап, ақыр аяғында ауруханаға түсіп, әдейі автокөлікке келіп соғылған болып шықты ма? Бұл енді ақылға сыймайды. Ол өзіне қол жұмсайтын адам емес, камикадзе де емес», – деді жәбірленушінің өкілі.
Заңгер Жол ережесінің талаптарына да назар аударды. Оның айтуынша, жүргізуші жолдың жүру бөлігіне шығар кезде маневрдің қауіпсіз екеніне көз жеткізіп, содан кейін ғана қозғалысын жалғастыруға міндетті. Сонымен қатар, ол «Жол жүрісі туралы» Заңның 94-бабына сілтеме жасап, көлік құралдары пайдалану қоршаған ортаға жоғары қауіп төндіретін қызмет түріне жататынын атап өтті.
Адвокат қорғалушысының дербес деректерінің жарияланғанын да алға тартты. Оның сөзінше, жәбірленуші тарап бұл деректерді таратуға қатысы бар адамдарды анықтап, кінәлілерді заңда белгіленген тәртіппен жауапкершілікке тартуға ниетті.
Сондай-ақ, Данияр Баянбаевтың өкілі жәбірленуші тараптың көрінеу жалған деп санайтын мәліметтердің таратылуына байланысты құқық қорғау органдарына жүгіну құқығын өзінде қалдыратынын ескертті. Өз мәлімдемесінде ол Қылмыстық кодекстің 274-бабына сілтеме жасады.
«Шындық біздің тарапта. Барлығы заңда белгіленген тәртіппен жүруі тиіс. Түпкілікті құқықтық бағаны сот береді», – деп қорытындылады Бақыт Жарқынбеков.
Еске сала кетейік, 31 шілде күні Алматыда журналист Динара Егеубаева басқарған автокөлік пен велосипедшінің қатысуымен жол-көлік оқиғасы болды. Соқтығыс салдарынан велосипедші ауыр жарақат алып, ауыр жағдайда ауруханаға жеткізілді. Зардап шеккен азаматқа жабық бас-ми жарақаты, бірнеше сүйектің сынуы мен өзге де дене жарақаттары диагнозы қойылды.
