جۋرناليست دينارا ەگەۋباەۆا ءوز اۆتوكولىگىمەن باسىپ كەتكەن ۆەلوسيپەدشىنىڭ ادۆوكاتى العاش رەت اتالعان ءىس بويىنشا كوپشىلىك الدىندا پىكىر ءبىلدىردى.
دانيار بايانباەۆتىڭ مۇددەسىن قورعايتىن زاڭ كونسۋلتانتى باقىت جارقىنبەكوۆتىڭ ايتۋىنشا، ونىڭ قوعامعا ۇندەۋ جاساۋىنا الەۋمەتتىك جەلىلەردە ۆەلوسيپەدشىنىڭ ءوزى جول-كولىك وقيعاسىن ادەيى ۇيىمداستىردى دەگەن اقپاردىڭ تارالۋى سەبەپ بولعان.
«وسى ۋاقىتقا دەيىن قىلمىستىق ءىستى قوعامدىق تالقىعا سالعىم كەلمەدى. تەرگەۋ بار، زاڭدا بەلگىلەنگەن ءتارتىپ بار. بىراق قوعامدىق كەڭىستىكتە جابىرلەنۋشىگە جالا جاۋىپ، ول جول-كولىك وقيعاسىن ءوزى ادەيى ارانداتتى دەگەن سوزدەر ايتىلا باستاعاندا، ءۇنسىز قالۋ مۇمكىن ەمەس»، – دەدى باقىت جارقىنبەكوۆ.
جابىرلەنۋشى تاراپتىڭ ايتۋىنشا، دينارا ەگەۋباەۆا ءوزىنىڭ مەدياداعى تانىمالدىعىن پايدالانىپ، بولعان وقيعانىڭ وزىنە ءتيىمدى نۇسقاسىن العا تارتىپ وتىر. بۇل نۇسقانى كەيبىر جۋرناليستەر مەن بلوگەرلەر دە قولداپ، تاراتىپ جاتىر. اتاپ ايتقاندا، قوعامدىق كەڭىستىكتە ۆەلوسيپەدشى ءوزى سوقتىعىسقانى، ءتىپتى، جول-كولىك وقيعاسىن قولدان جاسادى دەگەن پىكىرلەر ايتىلىپ ءجۇر.
ادۆوكات مۇنداي نۇسقانىڭ نەگىزى جوق دەپ سانايدى جانە ەڭ الدىمەن جول-كولىك وقيعاسىنىڭ ناقتى ءمان-جايى مەن تەرگەۋ ناتيجەلەرىنە سۇيەنۋگە شاقىرادى. ونىڭ ايتۋىنشا، جول اپاتىنان كەيىن دانيار بايانباەۆ اۋىر حالدە اۋرۋحاناعا جەتكىزىلگەن. وعان جابىق باس-مي جاراقاتى، بىرنەشە سۇيەكتىڭ سىنۋى جانە باسقا دا دەنە جاراقاتتارى دياگنوزى قويىلعان.
«سوندا ادام ءوز باسىن قاتەرگە تىگىپ، ءوزىن جاراقاتتاپ، اقىر اياعىندا اۋرۋحاناعا ءتۇسىپ، ادەيى اۆتوكولىككە كەلىپ سوعىلعان بولىپ شىقتى ما؟ بۇل ەندى اقىلعا سىيمايدى. ول وزىنە قول جۇمسايتىن ادام ەمەس، كاميكادزە دە ەمەس»، – دەدى جابىرلەنۋشىنىڭ وكىلى.
زاڭگەر جول ەرەجەسىنىڭ تالاپتارىنا دا نازار اۋداردى. ونىڭ ايتۋىنشا، جۇرگىزۋشى جولدىڭ ءجۇرۋ بولىگىنە شىعار كەزدە مانەۆردىڭ قاۋىپسىز ەكەنىنە كوز جەتكىزىپ، سودان كەيىن عانا قوزعالىسىن جالعاستىرۋعا مىندەتتى. سونىمەن قاتار، ول «جول ءجۇرىسى تۋرالى» زاڭنىڭ 94-بابىنا سىلتەمە جاساپ، كولىك قۇرالدارى پايدالانۋ قورشاعان ورتاعا جوعارى قاۋىپ توندىرەتىن قىزمەت تۇرىنە جاتاتىنىن اتاپ ءوتتى.
ادۆوكات قورعالۋشىسىنىڭ دەربەس دەرەكتەرىنىڭ جاريالانعانىن دا العا تارتتى. ونىڭ سوزىنشە، جابىرلەنۋشى تاراپ بۇل دەرەكتەردى تاراتۋعا قاتىسى بار ادامداردى انىقتاپ، كىنالىلەردى زاڭدا بەلگىلەنگەن تارتىپپەن جاۋاپكەرشىلىككە تارتۋعا نيەتتى.
سونداي-اق، دانيار بايانباەۆتىڭ وكىلى جابىرلەنۋشى تاراپتىڭ كورىنەۋ جالعان دەپ سانايتىن مالىمەتتەردىڭ تاراتىلۋىنا بايلانىستى قۇقىق قورعاۋ ورگاندارىنا جۇگىنۋ قۇقىعىن وزىندە قالدىراتىنىن ەسكەرتتى. ءوز مالىمدەمەسىندە ول قىلمىستىق كودەكستىڭ 274-بابىنا سىلتەمە جاسادى.
«شىندىق ءبىزدىڭ تاراپتا. بارلىعى زاڭدا بەلگىلەنگەن تارتىپپەن ءجۇرۋى ءتيىس. تۇپكىلىكتى قۇقىقتىق باعانى سوت بەرەدى»، – دەپ قورىتىندىلادى باقىت جارقىنبەكوۆ.
ەسكە سالا كەتەيىك، 31 شىلدە كۇنى الماتىدا جۋرناليست دينارا ەگەۋباەۆا باسقارعان اۆتوكولىك پەن ۆەلوسيپەدشىنىڭ قاتىسۋىمەن جول-كولىك وقيعاسى بولدى. سوقتىعىس سالدارىنان ۆەلوسيپەدشى اۋىر جاراقات الىپ، اۋىر جاعدايدا اۋرۋحاناعا جەتكىزىلدى. زارداپ شەككەن ازاماتقا جابىق باس-مي جاراقاتى، بىرنەشە سۇيەكتىڭ سىنۋى مەن وزگە دە دەنە جاراقاتتارى دياگنوزى قويىلدى.
