پرەزيدەنت قاسىم-جومارت توقاەۆ قازاقستان حالىق كەڭەسىنىڭ سەسسياسىندا جاڭا قۇرىلعان ورگاننىڭ قىزمەتىنە قاتىستى پىكىر ءبىلدىرىپ، ونىڭ ۇلتتىق قۇرىلتايعا بالاما قۇرىلىم ەمەس ەكەنىن مالىمدەدى.
مەملەكەت باسشىسى حالىق كەڭەسى مەن قۇرىلتايدىڭ وكىلەتتىكتەرى زاڭمەن ناقتى ايقىندالعانىن اتاپ ءوتتى.
«الايدا مىنا نارسەنى بىردەن ءتۇسىنىپ العان ءجون. حالىق كەڭەسى – قۇرىلتايعا بالاما مەكەمە ەمەس. كەڭەس مۇشەلەرى قۇرىلتايدىڭ قۇزىرەتىنە كىرەتىن جۇمىسپەن اينالىسپايدى. دەپۋتاتتاردىڭ قىزمەتىنە ارالاسپايدى. زاڭ بويىنشا وسىنداي ارەكەتتەرگە قۇقى جوق. تيىسىنشە، قۇرىلتاي دەپۋتاتتارىنىڭ دا حالىق كەڭەسىنىڭ جۇمىسىنا ارالاسۋعا حاقى جوق»،–دەدى ول.
قاسىم-جومارت توقاەۆ ەكى ينستيتۋتتىڭ ءبىر-ءبىرىن تولىقتىرىپ، ۇيلەسىمدى جۇمىس ىستەۋى ماڭىزدى ەكەنىن ايتتى. وسىعان بايلانىستى حالىق كەڭەسى مەن قۇرىلتاي كوميتەتتەرىنىڭ ءوزارا تىعىز بايلانىستا بولۋى قاجەت ەكەنىن جەتكىزدى.
«الدىمىزدا تۇرعان ماقسات تا – ءبىر، وتانىمىز دا – ءبىر. سوندىقتان ءبارىمىز ءبىرتۇتاس ەل بولىپ ءبىر جەڭنەن قول، ءبىر جاعادان باس شىعارىپ قازاقستان حالقى ءۇشىن تاباندى قىزمەت ەتۋىمىز كەرەك.
زاڭ جوبالارىن ازىرلەۋ بارىسىندا جۇرتشىلىقتىڭ وي-پىكىرىن، تالاپ-تىلەگىن تولىققاندى ەسكەرۋ قاجەت. قۇرىلتاي مەن حالىق كەڭەسى ارقاشاندا بىرگە بولسا، وسىنداي مۇمكىندىك مىندەتتى تۇردە پايدا بولادى. قازاقستان حالىق كەڭەسىنە ەتنومادەني بىرلەستىكتەردىڭ، ايماقتىق ءماسليحاتتار مەن قوعامدىق كەڭەستەردىڭ، سونداي-اق، قوعامدىق ۇيىمداردىڭ وكىلدەرى كىردى. وسىلايشا مەملەكەت پەن قوعام اراسىنداعى بايلانىستىڭ جاڭا، اۋقىمدى ءارى ءبىرتۇتاس جۇيەسى قالىپتاسىپ وتىر»،–دەپ تۇيىندەدى ول.
