شىعىس قازاقستان وبلىسىنىڭ قار باسقان تاۋلارىندا قالىپ قويعان 5 قازاقستاندىقتىڭ وقيعاسى امەريكالىق ميللياردەر يلون ماسكتىڭ نازارىن اۋداردى، دەپ حابارلايدى «ادىرنا» ءتىلشىسى.
بايلانىسسىز قالعان ەر ادامدار Starlink سپۋتنيكتىك ينتەرنەتى ارقىلى قۇتقارۋشىلارعا حابار بەرە العان.
«Starlink ادام ءومىرىن قۇتقارادى»، – دەپ جازدى ميللياردەر.
ايتا كەتەيىك، بۇل وقيعا قازان سوڭىندا بولعان ەدى. كۇرشىم اۋدانىندا بەس اڭشى مىنگەن جول تالعامايتىن كولىك بۇزىلىپ قالعان. ولار قىستاۋ كۇرشىم اۋىلىنان شامامەن 15 شاقىرىم جەردە، تاۋلى ايماقتا بولعان. ولارعا Starlink سپۋتنيكتىك بايلانىسى كومەكتەسكەن. ەر ادامدار وزدەرىنىڭ قاي جەردە ەكەنىن قۇتقارۋشىلارعا حابارلاپ، كومەك كەلگەنشە ولارمەن بايلانىستا بولعان.
اڭشىلارعا جەتۋ ءۇشىن توتەنشە جاعدايلار مينيسترلىگىنىڭ قىزمەتكەرلەرى «ترەكول» قاردا جۇرەتىن كولىگىمەن شامامەن 100 شاقىرىم جول جۇرگەن. قۇتقارۋشىلار ەر ادامداردى تاۋىپ، ولاردىڭ جول تالعامايتىن كولىگىن اۋىلعا دەيىن الىپ بارۋعا كومەكتەسكەن. ەشكىم مەديتسينالىق كومەككە مۇقتاج بولماعان.
ەسكە سالايىق، قازاقستانداعى Beeline كومپانياسى ەلدە Starlink Mobile تەحنولوگياسىن العاش بولىپ تانىستىرعان ەدى. بۇل تەحنولوگيا سمارتفون ارقىلى سپۋتنيكتىك بايلانىسقا تىكەلەي قوسىلۋعا مۇمكىندىك بەرەدى. ونىڭ باستى ارتىقشىلىعى – قوسىمشا جابدىق ساتىپ الۋدىڭ، سپۋتنيكتىك انتەننا ورناتۋدىڭ نەمەسە ارنايى تەرمينالداردى پايدالانۋدىڭ قاجەتى جوق. قوسىلۋ ءۇشىن ءموبيلدى قۇرىلعى مەن ءتيىستى بايلانىس ءپروفيلىن باپتاۋ جەتكىلىكتى.
