АҚШ-тың бірнеше штатында Хэллоуин мерекесі кезінде болған атыстар салдарынан 24 адам қаза тауып, 90-нан астам адам жарақат алды, деп хабарлайды "Адырна" ұлттық порталы The New York Times басылымына сілтеп.
Делавэр штатының губернаторы Мэтт Мейер қарулы зорлық-зомбылықты қалыпты жағдай ретінде қабылдауға болмайтынын айтты.
«Бұл – қалыпты жағдай емес. Біз қарулы зорлық-зомбылықты ешқашан өміріміздің ажырамас бөлігі ретінде қабылдамауымыз керек», – деді ол.
Оқиғалардың бірі Техас штатындағы Даллас қаласында болған. Deep Ellum ауданында бір жарым сағатқа жетпейтін уақыт ішінде үш рет атыс болып, кемінде төрт адам қаза тапты. Тағы 15 адам жарақат алды. Флорида штатының Джексонвилл қаласында болған екі бөлек атыс салдарынан екі адам көз жұмып, 11 адам жарақаттанды. Ал Калифорния штатында Spirit Halloween костюмдер дүкенінде оқ атылып, жүкті әйел қаза тапты. Тағы алты адам жарақат алды.
Делавэр штатында бір сағаттан астам уақыт ішінде екі жаппай атыс тіркелген. Эллендейл қаласында 17 жастағы қыз қаза тауып, сегіз адам жарақат алса, Ньюарк қаласында алты адам зардап шеккен.
Бұдан бөлек, Мичиган, Канзас, Техас, Иллинойс, Индиана, Арканзас және Миссисипи штаттарында да атыс оқиғалары болған.
Сондай-ақ 1 қарашада Алабама штатының Бирмингем қаласындағы Legion Field стадионы маңында атыс болып, бір адам қаза тапты. Тағы сегіз адам жарақат алды.
Осы оқиғадан кейін қалалық полиция департаменті Magic City Classic спорттық жарысының 85-ші жыл сайынғы іс-шараларына қатысты барлық шараны уақытша тоқтатқан. Құқық қорғау органдары тұрғындарға стадион маңына бармауды ескерткен.
Қазір Бирмингемдегі атыстың мән-жайы белгісіз.
