Ақтау қаласында тегін балмұздақ таратқан «Abu Baby» балалар киім дүкенінің иесі жауапқа тартылды, деп хабарлайды «Адырна» тілшісі.
Қала әкімдігінің мәліметінше, акция рұқсатсыз ұйымдастырылған.
«1 маусым – Халықаралық балаларды қорғау күніне орай Ақтау қаласындағы 29-шағынауданда «Abu Baby» балалар киім дүкені азық-түлік пен сыйлықтарды тегін тарату бойынша іс-шара ұйымдастырды. Алайда бұл акция алдын ала ескертілмеген және жергілікті атқарушы органдармен келіспестен өткізілген. Нәтижесінде көптеген адам жиналып, қоғамдық тәртіп бұзылып, қала тұрғындары арасында шиеленіс туындады», - деп мәлімдеді әкімдік өкілдері.
Осыған байланысты кәсіп иесіне 20 АЕК көлемінде айыппұл салынған.
Еске сала кетейік, азаматтардың жаппай қатысуымен өткізілетін кез келген іс-шаралар, соның ішінде қайырымдылық акциялары, азық-түлік пен сыйлықтарды тарату сынды іс-шаралар қоғамдық орындарда өткізілетін жағдайда, Қазақстан Республикасының қолданыстағы заңнамасына сәйкес, тиісті елді мекеннің әкімдігімен міндетті түрде алдын ала келісілуі қажет.
