Қазақстан Республикасының Ұлттық музейінің атриумынан бұрынғы президент Нұрсұлтан Назарбаевтың ескерткіші алынып тасталды, деп хабарлайды “Адырна” ұлттық порталы.
Мұражайдан ҚазАқпарат редакциясының хабарлауынша, бұл жәдігер мұражай меншігі болып табылады және зал концепциясының өзгеруіне байланысты мұражай қорында тұрақты сақталады.
Сондай-ақ, Мәдениет және ақпарат министрінің тапсырмасы бойынша шілде айында Ұлттық музейдің 10 жылдығын атап өту мақсатында 2024 жылдан бастап музей кеңістігін жақсарту жұмыстары басталғанын түсіндірді.
«Дүниежүзілік мұражай тәжірибесіне сәйкес, әрбір мұражай өзінің көрме залдарының концептуалды мазмұны мен көркемдік-стильдік дизайнын мезгіл-мезгіл жаңартып отыруға міндетті. Ұлттық музей осы тәжірибені қолдана отырып, атриумды түрлендіруге кірісті. Оның негізгі міндеті келушілер билеттерді сатып алуға, экскурсияларға тапсырыс беруге, отандық сувенирлерді сатып алуға, ғылыми оқу залына баруға болатын демалыс аймағының функционалдығын қамтамасыз ету болып табылады”, деді музейдің баспасөз қызметі.
Еске салайық, Қаңтарда Астанадағы ұлттық қорғаныс университетінің алдындағы Назарбаев ескерткіші алынған еді.
