قازاقستان رەسپۋبليكاسىنىڭ ۇلتتىق مۋزەيىنىڭ اتريۋمىنان بۇرىنعى پرەزيدەنت نۇرسۇلتان نازارباەۆتىڭ ەسكەرتكىشى الىنىپ تاستالدى، دەپ حابارلايدى “ادىرنا” ۇلتتىق پورتالى.
مۇراجايدان قازاقپارات رەداكتسياسىنىڭ حابارلاۋىنشا، بۇل جادىگەر مۇراجاي مەنشىگى بولىپ تابىلادى جانە زال كونتسەپتسياسىنىڭ وزگەرۋىنە بايلانىستى مۇراجاي قورىندا تۇراقتى ساقتالادى.
سونداي-اق، مادەنيەت جانە اقپارات ءمينيسترىنىڭ تاپسىرماسى بويىنشا شىلدە ايىندا ۇلتتىق مۋزەيدىڭ 10 جىلدىعىن اتاپ ءوتۋ ماقساتىندا 2024 جىلدان باستاپ مۋزەي كەڭىستىگىن جاقسارتۋ جۇمىستارى باستالعانىن ءتۇسىندىردى.
«دۇنيەجۇزىلىك مۇراجاي تاجىريبەسىنە سايكەس، ءاربىر مۇراجاي ءوزىنىڭ كورمە زالدارىنىڭ كونتسەپتۋالدى مازمۇنى مەن كوركەمدىك-ستيلدىك ديزاينىن مەزگىل-مەزگىل جاڭارتىپ وتىرۋعا مىندەتتى. ۇلتتىق مۋزەي وسى تاجىريبەنى قولدانا وتىرىپ، اتريۋمدى تۇرلەندىرۋگە كىرىستى. ونىڭ نەگىزگى مىندەتى كەلۋشىلەر بيلەتتەردى ساتىپ الۋعا، ەكسكۋرسيالارعا تاپسىرىس بەرۋگە، وتاندىق سۋۆەنيرلەردى ساتىپ الۋعا، عىلىمي وقۋ زالىنا بارۋعا بولاتىن دەمالىس ايماعىنىڭ فۋنكتسيونالدىعىن قامتاماسىز ەتۋ بولىپ تابىلادى”، دەدى مۋزەيدىڭ ءباسپاسوز قىزمەتى.
ەسكە سالايىق، قاڭتاردا استاناداعى ۇلتتىق قورعانىس ۋنيۆەرسيتەتىنىڭ الدىنداعى نازارباەۆ ەسكەرتكىشى الىنعان ەدى.
