Армения премьер-министрі Никол Пашинян елдің Еуропалық одаққа қосылуы мен Еуразиялық экономикалық одақ құрамынан шығуы туралы референдумды дәл қазір өткізудің негізі жоқ екенін мәлімдеді, деп хабарлайды «Адырна» тілшісі DW-ге сілтеме жасап.
Айтуынша, мұндай бастама «логикаға сай емес».
«ЕАЭО мен ЕО арасында таңдау жасау қажеттілігі туындамайынша, біз ЕАЭО аясында жұмысымызды жалғастыра береміз», – деді Пашинян.
Оның сөзінше, бүгінде бұл таңдау тек теориялық сипатта ғана, сондықтан теориялық мәселені референдумға шығару орынды емес.
Армения премьері референдум өткізу мәселесін ел ресми түрде ЕО мүшелігіне өтініш берген немесе кандидат мәртебесін алуға жақындаған кезеңге дейін кейінге қалдыруды ұсынды. Сол уақытқа дейін Армения ЕАЭО құрамында «бейбіт жағдайда, дау-дамайсыз» жұмысын жалғастырады. Пашинян бұл бағытта елдің әлі де пайдалануға болатын әлеуеті бар екенін атап өтті.
Осылайша Пашинян мамыр айының соңында Ресей президенті Владимир Путин көтерген референдум өткізу туралы бастамаға жауап берді. Кейін бұл ұсынысты ЕАЭО-ға мүше тағы үш елдің басшылары да қолдаған.
Кремльдің ресми сайты жариялаған бірлескен мәлімдемеде Армениядан Еуропалық одаққа кіру мен ЕАЭО мүшелігін сақтау арасында нақты таңдау жасауды талап еткен.
Құжатта: «Армения Республикасында мүмкіндігінше қысқа мерзімде Еуропалық одаққа кіру немесе Еуразиялық экономикалық одақ құрамында қалу мәселесі бойынша жалпыхалықтық референдум өткізу қажет деген ұстанымды қолдаймыз», – делінген.
Астанада өткен жиында қабылданған мәлімдеме авторлары Арменияның ЕО-ға кіруге дайындалуы ЕАЭО-ға мүше мемлекеттердің экономикалық қауіпсіздігіне елеулі тәуекелдер тудыруы мүмкін екенін де атап өтті.
Соңғы уақытта Ресей Арменияның Еуроодақпен жақындасуына байланысты қысымды күшейтіп отыр. Бұл жағдай 7 маусымға жоспарланған парламенттік сайлау қарсаңында байқалуда. Ресейдің ветеринарлық және фитосанитарлық бақылау қызметі бірқатар армян өнімдерінің, соның ішінде минералды су, көкөніс және коньяктың импортына шектеу қойды. Сонымен қатар Ресей Энергетика министрлігі Арменияға мұнай өнімдерін, табиғи газды және өңделмеген алмаздарды бажсыз жеткізу жөніндегі келісімді тоқтатуы мүмкін екенін мәлімдеді.
Путиннің айтуынша, ЕО мен ЕАЭО мүшелігін қатар алып жүру мүмкін емес. Ол сондай-ақ «украиналық сценарий» Киевтің Еуроодаққа кіруге ұмтылысынан басталғанын мәлімдеді.
30 мамырда Мәскеу өз елшісін Армениядан «кеңес алу үшін» кері шақырды. Кремльдің хабарлауынша, 1 маусымда Путин мен Пашинян телефон арқылы сөйлескен. Ресей президенті армян премьерін туған күнімен де құттықтаған. Ал Пашинян Армения мен Ресей арасындағы қарым-қатынастардың «трансформация кезеңінде» тұрғанын айтты.
