Armeniia premer-ministrı Nikol Paşinian eldıŋ Europalyq odaqqa qosyluy men Euraziialyq ekonomikalyq odaq qūramynan şyǧuy turaly referendumdy däl qazır ötkızudıŋ negızı joq ekenın mälımdedı, dep habarlaidy «Adyrna» tılşısı DW-ge sılteme jasap.
Aituynşa, mūndai bastama «logikaǧa sai emes».
«EAEO men EO arasynda taŋdau jasau qajettılıgı tuyndamaiynşa, bız EAEO aiasynda jūmysymyzdy jalǧastyra beremız», – dedı Paşinian.
Onyŋ sözınşe, bügınde būl taŋdau tek teoriialyq sipatta ǧana, sondyqtan teoriialyq mäselenı referendumǧa şyǧaru oryndy emes.
Armeniia premerı referendum ötkızu mäselesın el resmi türde EO müşelıgıne ötınış bergen nemese kandidat märtebesın aluǧa jaqyndaǧan kezeŋge deiın keiınge qaldyrudy ūsyndy. Sol uaqytqa deiın Armeniia EAEO qūramynda «beibıt jaǧdaida, dau-damaisyz» jūmysyn jalǧastyrady. Paşinian būl baǧytta eldıŋ älı de paidalanuǧa bolatyn äleuetı bar ekenın atap öttı.
Osylaişa Paşinian mamyr aiynyŋ soŋynda Resei prezidentı Vladimir Putin kötergen referendum ötkızu turaly bastamaǧa jauap berdı. Keiın būl ūsynysty EAEO-ǧa müşe taǧy üş eldıŋ basşylary da qoldaǧan.
Kremldıŋ resmi saity jariialaǧan bırlesken mälımdemede Armeniiadan Europalyq odaqqa kıru men EAEO müşelıgın saqtau arasynda naqty taŋdau jasaudy talap etken.
Qūjatta: «Armeniia Respublikasynda mümkındıgınşe qysqa merzımde Europalyq odaqqa kıru nemese Euraziialyq ekonomikalyq odaq qūramynda qalu mäselesı boiynşa jalpyhalyqtyq referendum ötkızu qajet degen ūstanymdy qoldaimyz», – delıngen.
Astanada ötken jiynda qabyldanǧan mälımdeme avtorlary Armeniianyŋ EO-ǧa kıruge daiyndaluy EAEO-ǧa müşe memleketterdıŋ ekonomikalyq qauıpsızdıgıne eleulı täuekelder tudyruy mümkın ekenın de atap öttı.
Soŋǧy uaqytta Resei Armeniianyŋ Euroodaqpen jaqyndasuyna bailanysty qysymdy küşeitıp otyr. Būl jaǧdai 7 mausymǧa josparlanǧan parlamenttık sailau qarsaŋynda baiqaluda. Reseidıŋ veterinarlyq jäne fitosanitarlyq baqylau qyzmetı bırqatar armian önımderınıŋ, sonyŋ ışınde mineraldy su, kökönıs jäne koniaktyŋ importyna şekteu qoidy. Sonymen qatar Resei Energetika ministrlıgı Armeniiaǧa mūnai önımderın, tabiǧi gazdy jäne öŋdelmegen almazdardy bajsyz jetkızu jönındegı kelısımdı toqtatuy mümkın ekenın mälımdedı.
Putinnıŋ aituynşa, EO men EAEO müşelıgın qatar alyp jüru mümkın emes. Ol sondai-aq «ukrainalyq ssenarii» Kievtıŋ Euroodaqqa kıruge ūmtylysynan bastalǧanyn mälımdedı.
30 mamyrda Mäskeu öz elşısın Armeniiadan «keŋes alu üşın» kerı şaqyrdy. Kremldıŋ habarlauynşa, 1 mausymda Putin men Paşinian telefon arqyly söilesken. Resei prezidentı armian premerın tuǧan künımen de qūttyqtaǧan. Al Paşinian Armeniia men Resei arasyndaǧy qarym-qatynastardyŋ «transformasiia kezeŋınde» tūrǧanyn aitty.
