Бүгін, 26 мамырда белгілі әнші Димаш Құдайберген Almaty Arena стадионында «D and Dears» атты фан-кездесуін өткізеді. Ticketon билет операторының мәліметінше, бұл кешке 40 елден астам жанкүйерлерге билет сатылды, деп хабарлайды «Адырна» тілшісі.
Іс-шара әншінің туған күніне орай өткізілмек. Сағат 20:00-де басталатын фан-кездесуге 8 мыңға жуық адам жиналады деп жоспарланып отыр.
Концерт режиссері Назгүл Қарабалина «Бүгін LIVE» бағдарламасына берген сұқбатында кештің ерекше өтетінін атап өтті.
«Алғашында бұл жай фан-кездесу болады деп жоспарланған. Бірақ арты үлкен концертке ұласып жатыр. Сондықтан аяқ астынан қызу дайындықты бастап кеттік. Бүгін керемет кеш болады. Димаш жанкүйерлерімен біраз сұхбаттасады. Жан-жақтан келген тыңдармандардың сұрақтарына жауап береді, — деді ол.
Айта кетейік, 27 мамырда әншінің «STRANGER» атты жеке концерті Қазақстанның барлық кинотеатрында көрсетіледі.
