بۇگىن، 26 مامىردا بەلگىلى ءانشى ديماش قۇدايبەرگەن Almaty Arena ستاديونىندا «D and Dears» اتتى فان-كەزدەسۋىن وتكىزەدى. Ticketon بيلەت وپەراتورىنىڭ مالىمەتىنشە، بۇل كەشكە 40 ەلدەن استام جانكۇيەرلەرگە بيلەت ساتىلدى، دەپ حابارلايدى «ادىرنا» ءتىلشىسى.
ءىس-شارا ءانشىنىڭ تۋعان كۇنىنە وراي وتكىزىلمەك. ساعات 20:00-دە باستالاتىن فان-كەزدەسۋگە 8 مىڭعا جۋىق ادام جينالادى دەپ جوسپارلانىپ وتىر.
كونتسەرت رەجيسسەرى نازگۇل قارابالينا «بۇگىن LIVE» باعدارلاماسىنا بەرگەن سۇقباتىندا كەشتىڭ ەرەكشە وتەتىنىن اتاپ ءوتتى.
«العاشىندا بۇل جاي فان-كەزدەسۋ بولادى دەپ جوسپارلانعان. بىراق ارتى ۇلكەن كونتسەرتكە ۇلاسىپ جاتىر. سوندىقتان اياق استىنان قىزۋ دايىندىقتى باستاپ كەتتىك. بۇگىن كەرەمەت كەش بولادى. ديماش جانكۇيەرلەرىمەن ءبىراز سۇحباتتاسادى. جان-جاقتان كەلگەن تىڭدارمانداردىڭ سۇراقتارىنا جاۋاپ بەرەدى، — دەدى ول.
ايتا كەتەيىك، 27 مامىردا ءانشىنىڭ «STRANGER» اتتى جەكە كونتسەرتى قازاقستاننىڭ بارلىق كينوتەاترىندا كورسەتىلەدى.
