Шымкентте құтқарушылар 24 метрлік құдықтан екі жасар қызды шығарды. Бұл туралы Төтенше жағдайлар министрлігі мәлімдеді, деп хабарлайды "Адырна".
Оқиға Қаратау ауданында, Құдайбергенов көшесіндегі жеке тұрғын үйдің аумағында болған. Ведомствоның мәліметінше, 2024 жылы туған бала үлкендердің қарауынсыз қалып, құдыққа құлап кеткен.
Оқиға орнына құтқарушылар жедел жетті. Олар құдықтың тереңдігі шамамен 24 метр екенін анықтады.
ТЖМ қызметкерлері альпинистік жабдықтарды қолдана отырып төмен түсіп, баланы жер бетіне ұқыпты шығарып алды.
Құтқару жұмыстарынан кейін қыз бала әрі қарай тексеру жүргізу үшін жедел медициналық көмек бригадасына тапсырылды.
ТЖМ ата-аналарға балаларды қараусыз қалдырмау қажеттігін еске салды.
