Қырымда жанармай тапшылығына байланысты жанармай құю бекеттерінің (АЗС) жұмыс тәртібіне уақытша өзгерістер енгізілді. Аймақ басшысы Сергей Аксеновтың мәлімдеуінше, таңғы сағат 9:00-ден бастап жеке және заңды тұлғаларға жанармай сату тоқтатылған, деп хабарлайды "Адырна" ұлттық порталы РБК басылымына сілтеп.
Жаңа тәртіпке сәйкес, бензин тек республиканың қауіпсіздігі мен тіршілігін қамтамасыз ететін мемлекеттік қызметтерге ғана босатылады. Билік өкілдері бұл шараның уақытша сипатқа ие екенін айтып, жағдайға байланысты қосымша ақпарат кейінірек жарияланатынын хабарлады.
Қырымда жанармаймен қамтамасыз ету мәселесі мамыр айының соңынан бері күрделене түсті. Сол кезде АИ-95 және АИ-92 маркалы бензиндерді сатуға шектеу енгізіліп, бір көлікке тәулігіне 20 литрден артық жанармай берілмейтін болды. Кейін әлеуметтік және коммуналдық көліктерге басымдық беріліп, талон арқылы жанармай алу тәртібі де өзгертілді.
Ресей Энергетика министрлігі оңтүстік өңірлердегі жанармай жеткізу қиындықтарын отын-энергетика нысандарына жасалған әуе шабуылдарының салдарымен байланыстырған. Ведомствоның мәліметінше, қалыптасқан жағдай уақытша сипатқа ие және мәселені шешу үшін арнайы штаб құрылған.
Сонымен қатар министрлік Қырым мен өзге өңірлерге жанар-жағармай жеткізу ерекше бақылауда екенін мәлімдеді. Ауыл шаруашылығы саласын маусымдық жұмыстар кезінде отынмен қамтамасыз ету мәселесі де мемлекеттік органдардың назарында тұр.
Ресми мәліметтерге сәйкес, ішкі жанармай нарығындағы жалпы жағдай тұрақты болып қала береді. Дегенмен Қырымдағы уақытша шектеулер өңірдегі жанармай қорын сақтап, маңызды мемлекеттік қызметтердің үздіксіз жұмысын қамтамасыз ету мақсатында енгізілген.
