قىرىمدا جانارماي تاپشىلىعىنا بايلانىستى جانارماي قۇيۋ بەكەتتەرىنىڭ (ازس) جۇمىس تارتىبىنە ۋاقىتشا وزگەرىستەر ەنگىزىلدى. ايماق باسشىسى سەرگەي اكسەنوۆتىڭ مالىمدەۋىنشە، تاڭعى ساعات 9:00-دەن باستاپ جەكە جانە زاڭدى تۇلعالارعا جانارماي ساتۋ توقتاتىلعان، دەپ حابارلايدى "ادىرنا" ۇلتتىق پورتالى ربك باسىلىمىنا سىلتەپ.
جاڭا تارتىپكە سايكەس، بەنزين تەك رەسپۋبليكانىڭ قاۋىپسىزدىگى مەن تىرشىلىگىن قامتاماسىز ەتەتىن مەملەكەتتىك قىزمەتتەرگە عانا بوساتىلادى. بيلىك وكىلدەرى بۇل شارانىڭ ۋاقىتشا سيپاتقا يە ەكەنىن ايتىپ، جاعدايعا بايلانىستى قوسىمشا اقپارات كەيىنىرەك جاريالاناتىنىن حابارلادى.
قىرىمدا جانارمايمەن قامتاماسىز ەتۋ ماسەلەسى مامىر ايىنىڭ سوڭىنان بەرى كۇردەلەنە ءتۇستى. سول كەزدە اي-95 جانە اي-92 ماركالى بەنزيندەردى ساتۋعا شەكتەۋ ەنگىزىلىپ، ءبىر كولىككە تاۋلىگىنە 20 ليتردەن ارتىق جانارماي بەرىلمەيتىن بولدى. كەيىن الەۋمەتتىك جانە كوممۋنالدىق كولىكتەرگە باسىمدىق بەرىلىپ، تالون ارقىلى جانارماي الۋ ءتارتىبى دە وزگەرتىلدى.
رەسەي ەنەرگەتيكا مينيسترلىگى وڭتۇستىك وڭىرلەردەگى جانارماي جەتكىزۋ قيىندىقتارىن وتىن-ەنەرگەتيكا نىساندارىنا جاسالعان اۋە شابۋىلدارىنىڭ سالدارىمەن بايلانىستىرعان. ۆەدومستۆونىڭ مالىمەتىنشە، قالىپتاسقان جاعداي ۋاقىتشا سيپاتقا يە جانە ماسەلەنى شەشۋ ءۇشىن ارنايى شتاب قۇرىلعان.
سونىمەن قاتار مينيسترلىك قىرىم مەن وزگە وڭىرلەرگە جانار-جاعارماي جەتكىزۋ ەرەكشە باقىلاۋدا ەكەنىن مالىمدەدى. اۋىل شارۋاشىلىعى سالاسىن ماۋسىمدىق جۇمىستار كەزىندە وتىنمەن قامتاماسىز ەتۋ ماسەلەسى دە مەملەكەتتىك ورگانداردىڭ نازارىندا تۇر.
رەسمي مالىمەتتەرگە سايكەس، ىشكى جانارماي نارىعىنداعى جالپى جاعداي تۇراقتى بولىپ قالا بەرەدى. دەگەنمەن قىرىمداعى ۋاقىتشا شەكتەۋلەر وڭىردەگى جانارماي قورىن ساقتاپ، ماڭىزدى مەملەكەتتىك قىزمەتتەردىڭ ۇزدىكسىز جۇمىسىن قامتاماسىز ەتۋ ماقساتىندا ەنگىزىلگەن.
