اقش پرەزيدەنتى دونالد ترامپ دەموكراتيالىق پارتيا كونگرەستىڭ ەكى پالاتاسىندا دا باسىمدىققا يە بولعان جاعدايدا ولاردىڭ زاڭنامالىق باستامالارىنا توسقاۋىل قويۋعا دايىن ەكەنىن مالىمدەدى. مەملەكەت باسشىسى بۇل ءۇشىن پرەزيدەنتتىك ۆەتو قۇقىعىن پايدالاناتىنىن ايتتى، دەپ حابارلايدى “ادىرنا”.
ترامپ بۇل تۋرالى داۋىس بەرۋ اياقتالماي تۇرىپ CBS News ارناسىنا بەرگەن سۇحباتىندا مالىمدەگەن. ونىڭ سوزىنشە، دەموكراتتارمەن كەلىسىمگە كەلۋدىڭ ءبىر جولى – ولاردىڭ زاڭ جوبالارىنا بىرنەشە اي بويى ۆەتو قويۋ.
«مەنىڭ قولىمدا ەڭ جوعارى وكىلەتتىك بار. ول – ۆەتو قۇقىعى. تاريحتا دا وسىلاي بولعان: بىرنەشە اي بويى ۆەتو قوياسىڭ، سودان كەيىن ولار وزدەرى كەلىپ: “بىزگە كەلىسىمگە كەلۋ كەرەك” دەيدى»، – دەدى اقش پرەزيدەنتى.
سونىمەن قاتار ترامپ سايلاۋ ناتيجەسىنە قاراماستان، ءوزىنىڭ ساياسي باعىتىن وزگەرتپەيتىنىن جەتكىزدى. ونىڭ پىكىرىنشە، جوعارعى سوتتىڭ بىرقاتار شەشىمى پرەزيدەنتتىڭ وكىلەتتىكتەرىن كەڭەيتۋگە مۇمكىندىك بەرگەن.
كەيىن The New York Times باسىلىمىنا بەرگەن سۇحباتىندا اق ءۇي باسشىسى ارالىق سايلاۋ ناتيجەلەرىن مويىنداۋعا جانە دەموكراتتارمەن بىرلەسىپ جۇمىس ىستەۋگە دايىن ەكەنىن ايتتى.
ء«بىز دەموكراتتارمەن جۇمىس ىستەيمىز جانە ولارمەن ىنتىماقتاستىقتى باستاۋعا قۋانىشتىمىز»، – دەدى ول.
Reuters اگەنتتىگىنىڭ حابارلاۋىنشا، سايلاۋشىلاردىڭ باسىم بولىگى ءۇشىن ەلدەگى تۇرمىس قۇنى مەن ەكونوميكالىق جاعداي داۋىس بەرۋ كەزىندە ماڭىزدى ءرول اتقارعان. ساۋالناماعا قاتىسقانداردىڭ شامامەن 90 پايىزى ءومىر ءسۇرۋ قۇنىن نەگىزگى فاكتورلاردىڭ ءبىرى رەتىندە اتاعان.
سونىمەن بىرگە كوپتەگەن ازامات دونالد ترامپتىڭ جۇرگىزىپ وتىرعان ساياساتىنا كوڭىلى تولمايتىنىن بىلدىرگەن.
CBS News جۇرگىزگەن ساۋالناما ناتيجەسى بويىنشا، رەسپوندەنتتەردىڭ تورتتەن ۇشىنە جۋىعى اقش-تىڭ قازىرگى دامۋ باعىتىنا قاناعاتتانبايدى.
سايلاۋالدى ناۋقان بارىسىندا دەموكراتتار ترامپ اكىمشىلىگىنىڭ ەكونوميكالىق ساياساتىن سىنعا الىپ، پرەزيدەنت پەن ونىڭ كومانداسىنىڭ قىزمەتىنە باقىلاۋدى كۇشەيتۋگە ۋادە بەرگەن.
Reuters مالىمەتىنشە، دەموكراتتار سەناتتا كوپشىلىك ورىنعا يە بولعان جاعدايدا پرەزيدەنت ۇسىنعان مەملەكەتتىك قىزمەتكەرلەر مەن فەدەرالدىق سۋديالاردىڭ كانديداتۋرالارىن بەكىتۋگە كەدەرگى كەلتىرە الادى.
ال وكىلدەر پالاتاسىن دا باقىلاۋىنا العان جاعدايدا، ولار ترامپ اكىمشىلىگىنىڭ قىزمەتىنە قاتىستى ءتۇرلى تەرگەۋلەر باستاۋعا جانە اق ءۇي ۇسىنعان زاڭ جوبالارىنىڭ قابىلدانۋىنا توسقاۋىل قويۋعا مۇمكىندىك الادى.
دەگەنمەن كونگرەستەگى ساياسي كۇشتەردىڭ اراقاتىناسى وزگەرگەنىمەن، دونالد ترامپ پرەزيدەنتتىك وكىلەتتىكتەرىن ساقتاپ قالادى. ول اتقارۋشى جارلىقتارعا قول قويۋدى جالعاستىرىپ، كونگرەسس قابىلداعان زاڭ جوبالارىنا ۆەتو قويا الادى.
وسىلايشا، دەموكراتتاردىڭ كونگرەستەگى ىقپالىنىڭ ارتۋى اق ءۇي مەن زاڭ شىعارۋشى بيلىك اراسىنداعى ساياسي تەكەتىرەستى كۇشەيتۋى مۇمكىن. ال الداعى كەزەڭدە ەكى پارتيانىڭ ءوزارا كەلىسىمگە كەلۋى اقش-تىڭ ىشكى ساياسي كۇن تارتىبىندەگى ماڭىزدى ماسەلەلەردىڭ بىرىنە اينالماق.
