اقش پرەزيدەنتى ترامپ ەۋروپالىق كوميسسيانىڭ امەريكالىق Google كومپانياسىنا 890 ملن ەۋرو كولەمىندە ايىپپۇل سالۋ تۋرالى شەشىمىنە قاتىستى مالىمدەمە جاسادى، دەپ حابارلايدى "ادىرنا" ءتىلشىسى BILD-كە سىلتەپ.
ەۋروپالىق وداققا قارسى جاۋاپ شارالارى قابىلداناتىنىن ايتتى. ترامپ ءوزىنىڭ Truth Social الەۋمەتتىك جەلىسىندەگى پاراقشاسىندا ەۋرووداقتىڭ ارەكەتىن «زاڭسىز ءارى ەتيكاعا قايشى» دەپ باعالاپ، وعان جاۋاپ رەتىندە ەو-عا قاتىستى ەلەۋلى تاريفتەر ەنگىزىلەتىنىن جازدى.
ەۋروپالىق كوميسسيا Google كومپانياسىن ينتەرنەتتەگى باسەكەلەستىكتى شەكتەدى دەپ ايىپتاپ وتىر. تەرگەۋ قورىتىندىسىنا سايكەس، كومپانيا ىزدەۋ ناتيجەلەرىندە ءوز سەرۆيستەرىنە باسىمدىق بەرگەن. سونىمەن قاتار Android پلاتفورماسىنداعى قوسىمشا ازىرلەۋشىلەردىڭ پايدالانۋشىلاردى بالاما تولەم جۇيەلەرى مەن قوسىمشالار دۇكەندەرىنە باعىتتاۋىنا كەدەرگى كەلتىرگەنى ايتىلعان. Google تاعىلعان ايىپتاردى جوققا شىعارىپ، بريۋسسەلدىڭ تالاپتارى ىزدەۋ جۇيەسىنىڭ ساپاسىن تومەندەتىپ، Play Store دۇكەنىنىڭ قاۋىپسىزدىك تەتىكتەرىن السىرەتەتىنىن مالىمدەدى. كومپانيا ەۋروكوميسسيا شەشىمىنە شاعىمدانۋ مۇمكىندىگىن دە قاراستىرىپ جاتقانىن حابارلادى.
ايتا كەتەيىك، بۇل Google-عا ەۋروپالىق وداق تاراپىنان سالىنعان العاشقى ايىپپۇل ەمەس. سوڭعى شەشىمدى قوسا ەسەپتەگەندە، كومپانياعا سالىنعان انتيمونوپوليالىق ايىپپۇلداردىڭ جالپى كولەمى 10,38 ملرد ەۋروعا جەتتى.
