فوتو: Sammer AI-Doumy/AFP
فرانتسيادا 31 قازان قاتارىنان ءۇشىنشى سەنبىدە وتكەن جاپپاي نارازىلىق اكتسيالارى كەزىندە 565 ادام ۇستالدى. ەلدىڭ ىشكى ىستەر مينيسترلىگىنىڭ مالىمەتىنشە، شەرۋلەرگە 320 مىڭ ادام قاتىسقان. بۇل تۋرالى AFP اگەنتتىگى حابارلادى، دەپ جازادى “ادىرنا”.
مينيستر لوران نۋنەستىڭ ايتۋىنشا، دەمونستراتسيالار نەگىزىنەن بەيبىت وتكەن. الايدا ۋلتراسولشىل توپتاردىڭ وكىلدەرى قۇقىق قورعاۋ ورگاندارىنا قارسى زورلىق-زومبىلىق كورسەتكەن.
بيلىك مالىمەتىنشە، پاريجدە نارازىلىق اكتسيالارىنا 70 مىڭ ادام قاتىسقان. ال شەرۋدى ۇيىمداستىرۋشىلار ەل بويىنشا كوشەگە شىققانداردىڭ سانى 500 مىڭعا جۋىقتاعانىن ايتادى. نارازىلىق بىلدىرۋشىلەر ءومىر ءسۇرۋ قۇنىنىڭ وسۋىنە جانە ءبىلىم بەرۋ سالاسىنداعى ماسەلەلەرگە قارسىلىق تانىتقان.
فرانتسيا بويىنشا قوعامدىق ءتارتىپتى قامتاماسىز ەتۋگە 70 مىڭ پوليتسەي جۇمىلدىرىلدى. پاريجدە پوليتسيامەن بولعان قاقتىعىستار كەزىندە بەس قۇقىق قورعاۋ ورگانى قىزمەتكەرى جاراقات العان. ولاردىڭ ۇشەۋى «مولوتوۆ كوكتەيلىنەن» زارداپ شەككەن. ءبىر پوليتسەيدىڭ كيىمى ورتەنىپ، اياعى كۇيگەن.
ەلوردادا نارازىلىق بىلدىرۋشىلەر پوليتسەيلەرگە تاس پەن برۋسچاتكا لاقتىرعان. بۇعان جاۋاپ رەتىندە قۇقىق قورعاۋ ورگاندارى كوزدەن جاس اعىزاتىن گاز بەن تاياق قولدانعان.
تۋلۋزادا رۇقسات ەتىلمەگەن اكتسياعا قاتىسۋشىلارعا قارسى سۋ شاشاتىن كولىكتەر مەن كوزدەن جاس اعىزاتىن گاز قولدانىلدى. مارسەلدە شامامەن 10 مىڭ ادام قاتىسقان شەرۋ قاقتىعىسقا ۇلاسقان. ليوندا دا پوليتسيامەن قاقتىعىستار تىركەلىپ، تارتىپسىزدىككە قاتىسۋشىلارعا قارسى كوزدەن جاس اعىزاتىن گاز قولدانىلعان.
فرانتسياداعى جالپىحالىقتىق دەمونستراتسيالار قىركۇيەك ايىنىڭ سوڭىندا مەكتەپ وقۋشىلارى مەن ستۋدەنتتەردىڭ نارازىلىعىنان باستالعان. وعان مۇعالىمدەردىڭ جەتىسپەۋى، سىنىپتارداعى وقۋشىلار سانىنىڭ كوپتىگى، وقۋ كۇنىنىڭ ۇزاقتىعى، مەكتەپ عيماراتتارىنىڭ ەسكىرۋى جانە زاماناۋي جابدىقتاردىڭ بولماۋى سەبەپ بولعان.
سونىمەن قاتار جاستار جوعارى وقۋ ورىندارىنا ءتۇسۋ كەزىندەگى قيىندىقتار مەن بولاشاقتارىنا الاڭداۋشىلىق بىلدىرگەن.
كەيىن نارازىلىقتارعا باسقا دا الەۋمەتتىك ماسەلەلەرگە كوڭىلى تولمايتىن ازاماتتار قوسىلعان. سونىڭ سالدارىنان كەيبىر اكتسيالار تارتىپسىزدىككە ۇلاسىپ، كوشەلەردە كولىكتەر مەن قوقىس جاشىكتەرى ورتەنگەن. پوليتسيامەن قاقتىعىستار، ۆانداليزم جانە توناۋ وقيعالارى تىركەلگەن.
فرانتسياداعى نارازىلىقتار ەۋروپانىڭ باسقا ەلدەرىندەگى جاستارعا دا اسەر ەتكەن. يتاليا، گەرمانيا جانە بەلگيادا دا وسىنداي اكتسيالار وتكەن. 31 قازاندا گەرمانيانىڭ ءىرى قالالارىندا جاستاردىڭ نارازىلىعى تارتىپسىزدىككە ۇلاسقان.
دەگەنمەن فرانتسياداعى نارازىلىقتارعا قاتىسۋشىلار سانى بىرتىندەپ ازايىپ كەلەدى. بيلىكتىڭ باعالاۋىنشا، 17 قازاندا كوشەگە 550 مىڭ ادام شىقسا، 24 قازاندا ولاردىڭ سانى 410 مىڭ بولعان.
