رەسەي پرەزيدەنتى ۆلاديمير پۋتين ۋكرايناداعى سوعىستى ديپلوماتيالىق جولمەن توقتاتىپ، بەيبىتشىلىككە قول جەتكىزۋگە مۇمكىندىك بار دەپ سانايدى. ونىڭ پىكىرىنشە، بۇل ماسەلە ەڭ الدىمەن سوعىسىپ جاتقان تاراپتار – رەسەي مەن ۋكراينا اراسىندا تىكەلەي تالقىلانۋى كەرەك. ال باسقا مەملەكەتتەر بۇل ۇدەرىستى قولداپ، وعان كومەكتەسۋى ءتيىس.
رەسەي باسشىسى بۇل تۋرالى 3 قىركۇيەك، بەيسەنبى كۇنى شىعىس ەكونوميكالىق فورۋمى (شەف) اياسىندا سويلەگەن سوزىندە مالىمدەدى.
«ەڭ الدىمەن رەسەي مەن ۋكراينا ءوزارا كەلىسۋى كەرەك. ال قالعان بارلىق ەلدەر قولداۋعا جانە كومەكتەسۋگە دايىن. بۇل – دۇرىس ءتاسىل. دەگەنمەن وسى ماسەلەنى رەتتەۋگە ءوز ۇلەسىن قوسۋعا تىرىسىپ جۇرگەندەردىڭ بارلىعىنا العىس ايتامىز. مۇمكىندىك بار ما؟ مەنىڭ ويىمشا، ءيا، مۇمكىندىك بار»، – دەدى پۋتين.
ول سونداي-اق ماسكەۋ مەن كيەۆ اراسىندا ارنايى قىزمەتتەر ارقىلى بايلانىس ساقتالىپ وتىرعانىن ايتتى. الايدا بۇل بايلانىستاردىڭ بەيبىتشىلىككە قول جەتكىزۋگە قانشالىقتى ىقپال ەتە الاتىنىن ناقتى ايتا المادى.
سونىمەن قاتار پۋتين ۋكراينانىڭ قارا تەڭىزدەگى كولىك كەمەلەرىنە جاساعان شابۋىلدارى مەن كيەۆتىڭ رەسەيدىڭ اۋە كەڭىستىگىن قاۋىپتى دەپ جاريالاعانىن اتاپ ءوتتى. رەسەي پرەزيدەنتىنىڭ ايتۋىنشا، مۇنداي فاكتورلار «ەكىجاقتى بەيبىت كەلىسسوزدەر جۇرگىزۋ مۇمكىندىگىن قيىنداتادى».
سول كۇنى كەشىرەك ۋكراينا پرەزيدەنتى ۆلاديمير زەلەنسكي دە رەسەيمەن كەلىسسوزدەردى قايتا باستاۋ مۇمكىندىگى تۋرالى مالىمدەدى.
ونىڭ ايتۋىنشا، جاقىن ارادا اقش وكىلدەرى كيەۆ پەن ماسكەۋگە بارىپ، وسى كەزدەسۋلەر بارىسىندا ىقتيمال بەيبىت كەلىسىم ماسەلەسى تالقىلانادى.
«الدىن الا بەلگىلەنگەن كۇندەر بار. اقش پرەزيدەنتىنىڭ وكىلدەرى كيەۆكە كەلەدى دەپ ۇمىتتەنەمىز. ولاردان راستاۋ دا الدىق: ماسكەۋدە دە، كيەۆتە دە كەزدەسۋ بولادى»، – دەدى زەلەنسكي ۋكراينالىقتارعا جاساعان كۇندەلىكتى كەشكى بەينەۇندەۋىندە.
ول ۋكراينا اقش كومانداسىمەن تۇراقتى بايلانىستا ەكەنىن قوستى.
بىرنەشە كۇن بۇرىن زەلەنسكي اقش پرەزيدەنتىنىڭ ارنايى وكىلدەرى ستيۆەن ۋيتكوففپەن جانە دجارەد كۋشنەرمەن تەلەفون ارقىلى سويلەسكەنىن حابارلاعان. اڭگىمە بارىسىندا ول اقش وكىلدەرىنە رەسەيدىڭ مايدانداعى جەتىستىكتەرى «ماردىمسىز» ەكەنىن ايتقان.
رەسەي مەن ۋكراينا اراسىنداعى بەيبىت كەلىسسوزدەردى قايتا باستاۋ مۇمكىندىگى تۋرالى پىكىرتالاس تامىز ايىنىڭ سوڭىندا تسرۋ ديرەكتورى دجون رەتكليففتىڭ ماسكەۋگە جاريالانباعان ساپارىنان كەيىن قايتا جانداندى.
Axios باسىلىمىنىڭ مالىمەتىنشە، ترامپ اكىمشىلىگىنىڭ وكىلى رەسەي تاراپىنا اقش، رەسەي جانە ۋكراينا پرەزيدەنتتەرىنىڭ ۇشجاقتى كەزدەسۋىن وتكىزۋ يدەياسىن ۇسىنعان. كەزدەسۋدىڭ ماقساتى — سوعىستى ديپلوماتيالىق جولمەن توقتاتۋ ماسەلەسىن تالقىلاۋ بولعان.
باق-تا بۇل اقپارات تاراعاننان كەيىن دونالد ترامپ جۋرناليستەرمەن سويلەسكەن كەزدە جاقىن ارادا ۇشجاقتى سامميت وتكىزۋ يدەياسىن جوققا شىعاردى.
امەريكا پرەزيدەنتىنىڭ ايتۋىنشا، ەگەر ترامپ قالاسا، پۋتين مۇنداي كەزدەسۋگە كەلىسەر ەدى جانە ۆاشينگتون ءسامميتتى «دەرەۋ» ۇيىمداستىرا الادى.
«بىراق مەن كەزدەسۋدى بەيبىت كەلىسىم جاساۋعا دايىن بولعان كەزدە وتكىزگىم كەلەدى»، – دەپ اتاپ ءوتتى اق ءۇي باسشىسى.
ترامپ سونداي-اق «پۋتين مەن زەلەنسكي وسى اقىماق سوعىستى توقتاتۋى كەرەك» دەدى. ول جالعاسىپ جاتقان سوعىس ءۇشىن جاۋاپكەرشىلىكتى قايتادان ماسكەۋ مەن كيەۆكە قاتار جۇكتەدى.
ترامپتىڭ پىكىرىنشە، ۋكرايناداعى بەيبىتشىلىككە جەتۋدەگى باستى ماسەلەلەردىڭ ءبىرى – زەلەنسكي مەن پۋتين اراسىنداعى جەكە ارازدىق. ونىڭ ايتۋىنشا، وسى جاعداي سالدارىنان قاقتىعىس ءوزى پرەزيدەنتتىك ناۋقان كەزىندە ء«بىر تاۋلىكتە اياقتايمىن» دەپ ۋادە بەرگەننەن الدەقايدا كۇردەلى بولىپ شىقتى.
پرەزيدەنتتىڭ ايتۋىنشا، ول بيلىكتە بولعان ەكى جىلعا جەتپەيتىن ۋاقىت ىشىندە توقتاتۋعا ۇلگەرگەن سەگىز سوعىستىڭ وزىنەن ۋكرايناداعى قاقتىعىستى رەتتەۋ كۇردەلىرەك بولىپ وتىر.
