مەملەكەتتىك قىزمەتكەرلەر تابىس دەكلاراتسياسىن قاتە تولتىرۋى سالدارىنان 759 ملرد تەڭگە «قارىز» بولىپ قالعان. بۇل تۋرالى مەملەكەتتىك كىرىستەر كوميتەتى مالىمدەدى، دەپ حابارلايدى “ادىرنا” ۇلتتىق پورتالى.
جالپىعا بىردەي دەكلاراتسيالاۋدىڭ ءبىرىنشى كەزەڭىنىڭ قورىتىندىسى بويىنشا 11 مىڭ مەملەكەتتىك قىزمەتشى، ولارعا تەڭەستىرىلگەن ادامدار مەن ولاردىڭ جۇبايلارى جەكە تابىس سالىعى بويىنشا 759 ملرد تەڭگە سوماسىندا بەرەشەك.
“دەكلاراتسيالاردى تالداۋ بارىسىندا سالىق سالىناتىن تابىس بولماعاندا بيۋدجەتكە تولەنەتىن جەكە تابىس سالىعىنىڭ سومالارى قاتە كورسەتىلگەن. مەملەكەتتىك كىرىستەر كوميتەتى قازاقستاندىقتارعا دەكلاراتسيانى مۇقيات تولتىرۋدى ءارى تەكسەرۋ كەرەكتىگىن ەسكەرتتى. وندا قاتە انىقتالعان جاعدايدا دەكلاراتسيانىڭ «ە» بولىمىندە جەكە تابىس سالىعىنىڭ سوماسىن كەمىتىپ، قوسىمشا دەكلاراتسيانى تاپسىرۋ كەرەك”، - دەپ جازىلعان حابارلامادا.
قاتە تۇزەتىلمەگەن جاعدايدا جەكە سوت ورىنداۋشىلارى سالىق بۇيرىقتارى نەگىزىندە بانك شوتىن بۇعاتتاۋى مۇمكىن. دەكلاراتسياعا قاتىستى سۇراقتار بويىنشا تۇرعىلىقتى مەكەنجاي بويىنشا مەملەكەتتىك كىرىستەر ورگانىنا جۇگىنۋ قاجەت.
”ادىرنا” ۇلتتىق پورتالى
