2025 جىلى قازاقستاندا مەملەكەتتىك قىزمەت كورسەتۋ ءتارتىبىن بۇزعان مەملەكەتتىك قىزمەتكەرلەرگە جالپى سوماسى 99,3 مىڭ اقش دوللارى كولەمىندە ايىپپۇل سالىندى. بۇل تۋرالى مەملەكەتتىك قىزمەت ىستەرى اگەنتتىگى (مقىا) مالىمدەدى، دەپ حابارلايدى “ادىرنا”.
اگەنتتىكتىڭ دەرەگىنشە، جىل ىشىندە 442 لاۋازىمدى تۇلعاعا قاتىستى 917 اكىمشىلىك حاتتاما تولتىرىلعان. قۇقىقبۇزۋشىلىقتار نەگىزىنەن مەملەكەتتىك قىزمەت كورسەتۋ مەرزىمدەرىن ساقتاماۋ، رۇقسات قۇجاتتارىن بەرۋ ءتارتىبىن بۇزۋ جانە ازاماتتارعا قىزمەت كورسەتۋدەن نەگىزسىز باس تارتۋ جاعدايلارىمەن بايلانىستى.
جاۋاپكەرشىلىككە تارتىلعانداردىڭ 375-ءى جەرگىلىكتى اتقارۋشى ورگانداردا، ال 67-ءسى ورتالىق مەملەكەتتىك ورگانداردا قىزمەت ەتكەن.
قارجىلاي جازاعا قوسا، 1 636 مەملەكەتتىك قىزمەتكەر تارتىپتىك جاۋاپكەرشىلىككە تارتىلدى. ولاردىڭ 1 331-ءى جەرگىلىكتى اكىمدىكتەردىڭ، 305-ءى مينيسترلىكتەر مەن ورتالىق مەملەكەتتىك ورگانداردىڭ قىزمەتكەرلەرى. تارتىپتىك شارا قولدانىلعانداردىڭ 27,3 پايىزى باسشىلىق لاۋازىمدا بولعانى اتاپ ءوتىلدى.
2025 جىلى مەملەكەتتىك قىزمەت كورسەتۋ سالاسىندا جالپى سانى 478 مىڭنان استام زاڭبۇزۋشىلىق انىقتالعان. ونىڭ 130 751-ءى ورتالىق مەملەكەتتىك ورگانداردا، ال 347 692-ءسى جەرگىلىكتى دەڭگەيدە تىركەلگەن. ەڭ ءجيى كەزدەسكەن بۇزۋشىلىق — قىزمەت كورسەتۋ مەرزىمدەرىنىڭ ساقتالماۋى، مۇنداي جاعدايلار 147 105 رەت تىركەلگەن.
جۇرگىزىلگەن تەكسەرۋلەر ناتيجەسىندە 12 340 ازاماتتىڭ قۇقىعى قالپىنا كەلتىرىلدى.
سونىمەن قاتار، مەملەكەتتىك قىزمەت ىستەرى اگەنتتىگىنە مەملەكەتتىك قىزمەتتەردىڭ ساپاسىنا قاتىستى 2 737 شاعىم تۇسكەن. شاعىمداردىڭ باسىم بولىگى جەرگىلىكتى اتقارۋشى ورگانداردىڭ، مەملەكەتتىك كاسىپورىنداردىڭ جانە جەر قاتىناستارى سالاسىنداعى ۇيىمداردىڭ جۇمىسىنا بايلانىستى بولعان. وسى وتىنىشتەر نەگىزىندە 481 جوسپاردان تىس تەكسەرۋ جۇرگىزىلىپ، ناتيجەسىندە 233 ازاماتتىڭ قۇقىعى قورعالدى.
جالپى العاندا، اگەنتتىك جىل بويى 4 316 باقىلاۋ ءىس-شاراسىن وتكىزگەن. ناتيجەسىندە 720 رەسمي ۇسىنىس پەن 2 164 ۇيعارىم شىعارىلىپ، ولاردىڭ 2 026-سى تولىق ورىندالعان.
