ىشكى ىستەر مينيسترلىگى جول قوزعالىسىنا قاتىسۋشىلارعا ۇندەۋ جاسادى، دەپ حابارلايدى «ادىرنا» ءتىلشىسى.
ءىىم تاۋەلسىزدىك كۇنىنە وراي بىرقاتار جۇرگىزۋشىنىڭ كولىكتەرىن مەملەكەتتىك تۋمەن بەزەندىرىپ، جولعا شىققاندارىن اتاپ ءوتتى.
«قۇقىقتىق تۇرعىدان مەملەكەتتىك تۋدى كولىككە ورنالاستىرعانى ءۇشىن جاۋاپكەرشىلىك قاراستىرىلماعان، بىراق قاۋىپسىزدىك تالاپتارى مەن جول ءجۇرىسى قاعيدالارىن ساقتاۋ مىندەتتى. بىراق كەيبىر ازامات مەرەكەلىك شارالار بارىسىندا جول قوزعالىسى ەرەجەلەرىن بۇزىپ، باسقا قاتىسۋشىلارعا كەدەرگى جاساپ، كوشەلەردى جاۋىپ تاستادى»،-دەدى ءىىم اپك-ءنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
وسىعان بايلانىستى پوليتسيا قىزمەتكەرلەرى زاڭعا سايكەس شارالار قابىلداۋعا ءماجبۇر بولعان. مىسالى 16 جەلتوقساندا شىمكەنت جانە الماتى قالالارىندا پوليتسيا قىزمەتكەرلەرى كولىكتەرگە تۋ ىلگەن، الايدا جول ەرەجەلەرىن بۇزعان بىرنەشە كولىكتى توقتاتقان. تەكسەرۋ ناتيجەسىندە جۇرگىزۋشىلەر كولىكتى باسقارۋ قۇقىعىنسىز جۇرگىزگەنى، اپاتتىق جاعداي تۋعىزعانى جانە كولىكتى زاڭسىز جابدىقتاعانى ءۇشىن اكىمشىلىك جاۋاپكەرشىلىككە تارتىلعان.
«بۇل شارالاردىڭ مەملەكەتتىك تۋدى پايدالانۋعا قاتىسى جوق. الماتى قالاسىندا پوليتسيا قىزمەتكەرلەرى دە شارلارمەن بەزەندىرىلگەن قوعامدىق كولىكتىڭ جۇرگىزۋشىسى مەن جولاۋشىلارىنا ولاردىڭ ادام ءومىرى مەن دەنساۋلىعىنا قاۋىپتى ەكەنىن ءتۇسىندىردى. سونداي-اق كولىكتى زاڭسىز توقتاتۋعا بايلانىستى دەرەكتەر تەكسەرىلۋدە. كىنالى پوليتسيا قىزمەتكەرلەرى قاتاڭ تارتىپتىك جاۋاپكەرشىلىككە تارتىلادى. پوليتسيا مەملەكەتتىك رامىزدەرگە قۇرمەتپەن قارايدى جانە ازاماتتاردى جول قوزعالىسى ەرەجەلەرىن ساقتاۋعا، تەك رەسمي مالىمەتتەر مەن اقپارات كوزدەرىنە سەنۋگە شاقىرادى»،- دەپ تولىقتىردى اعا ينسپەكتور.
