قازاقستاندا اي سايىن ورتا ەسەپپەن 62 كولىك ۇرلانادى، ال ماقساتسىز ايداپ اكەتۋ شامامەن 150 جاعدايدى قۇرايدى. بۇل تۋرالى ىشكى ىستەر مينيسترلىگى ايتتى، دەپ حابارلايدى «ادىرنا» ءتىلشىسى Liter.kz-كە سىلتەمە جاساپ.
ۇرلىق سانى بويىنشا الماتى قالاسى كوش باستاپ تۇر. بۇل شاھاردا ايىنا شامامەن 21 كولىك ۇرلانادى ەكەن. ودان كەيىنگى ورىندارعا قاراعاندى (~8), شىمكەنت پەن تۇركىستان وبلىستارى (~5) جايعاستى.
ادۆوكات نازار ءابىنوۆ سوڭعى كەزدە اۆتوسالون ارقىلى كولىك الۋ جاعىمسىز جاعدايلارعا ءجيى ۇلاسىپ جۇرگەنىن مالىمدەدى.
«كەيدە كولىك ساتىپ العاننان كەيىن ەكى اپتا وتپەي جاتىپ، ونىڭ بانكتە كەپىلدە ەكەنى نەمەسە ۇرلانعاندار قاتارىندا تۇرعانى انىقتالىپ جاتادى. ساتىپ الۋشى اقشا تولەيدى، بىراق ءىس جۇزىندە مۇلكىنەن ايىرىلادى»، – دەيدى ول.
ايتۋىنشا، ەگەر اۆتوسالون ساتۋشى رەتىندە ارەكەت ەتسە (B2C), زاڭ بويىنشا كولىك ءۇشىنشى تۇلعالاردىڭ قۇقىعىنان بوس بولۋى ءتيىس. ال ەگەر سالون تەك دەلدال بولسا، جاۋاپكەرشىلىك كولىكتىڭ ناقتى يەسىندە قالادى. دەگەنمەن، سالون تاۋەكەلدەردى جاسىرعان جاعدايدا نەمەسە كليەنتتى ادەيى جاڭىلىستىرسا، جاۋاپقا تارتىلۋى مۇمكىن.
ءابىنوۆ ماسەلە تۋىنداعان جاعدايدا الدىمەن ساتۋشىعا جازباشا شاعىم جىبەرىپ، اقشانى قايتارۋدى نەمەسە كولىكتى اۋىستىرۋدى تالاپ ەتۋ كەرەكتىگىن ايتتى. ەگەر جاعداي ۇرلىقپەن بايلانىستى بولسا، بىردەن پوليتسياعا جۇگىنۋ قاجەت. ال ناتيجە شىقپاسا، سوتقا بارۋعا تۋرا كەلەدى.
ادۆوكات زاڭ كۇشەيتىلمەيىنشە، ساتىپ الۋشىنىڭ جالعىز قورعانىسى مۇقيات بولۋ ەكىندەگىن ايتتى.
«مىندەتتى تۇردە eGov پورتالىنان “كولىك تاريحىن” تەكسەرىڭىز. ونىڭ ىشىنە كەپىلدەر، شەكتەۋلەر، تىيىمدار، يەلەر سانى تۋرالى اقپارات كىرەدى. VIN-كود پەن قۇجاتتاردى مۇقيات ءوزىڭىز قاراپ شىعىڭىز. ەگەر كولىك يمپورتتىق نەمەسە قىمبات بولسا، كەپىلدىڭ جوقتىعى نەمەسە قۇجاتتىڭ دۋبليكاتى جونىندە راستاۋ سۇراڭىز. تەكسەرۋ جۇمىستارىنان باس تارتۋ نەمەسە كولىكتى جەدەل راسىمدەۋ سىنىد ۇسىنىستارعا كەلىسپەڭىز»،—دەدى ول.
ەسكە سالايىق، 1 قىركۇيەكتە ورال قالاسىندا كولىك ۇرلىعى قايعىلى جاعدايعا اكەلگەن ەدى. ەر ادام Renault Logan اۆتوكولىگىن ايداپ كەتىپ، پوليتسەيلەردەن قاشۋ كەزىندە ءىرى جول اپاتىن جاساعان. سالدارىنان Lada Granta جۇرگىزۋشىسى قازا تاپقان.
