قازاقستاندا وكتان سانى مەن كۇكىرت مولشەرى بەلگىلەنگەن تالاپتارعا سايكەس كەلمەگەن بەنزيندى ساتۋعا تىيىم سالىندى. بۇل تۋرالى LS باسىلىمى ساۋدا جانە ينتەگراتسيا مينيسترلىگىنە سىلتەمە جاساپ جازدى، دەپ حابارلايدى “ادىرنا”.
ۆەدومستۆونىڭ مالىمەتىنشە، 2026 جىلى تەحنيكالىق رەتتەۋ جانە مەترولوگيا كوميتەتىنىڭ اۋماقتىق دەپارتامەنتتەرى جانارماي قۇيۋ ستانتسيالارىندا 55 باقىلاۋ ءىس-شاراسىن جۇرگىزگەن. ونىڭ ىشىندە جوسپاردان تىس تەكسەرۋلەر، پروفيلاكتيكالىق باقىلاۋ جانە باقىلاۋ ماقساتىندا ساتىپ الۋ شارالارى بار. ناتيجەسىندە بەنزيننىڭ 22 ۇلگىسى الىنىپ، ءۇش جاعدايدا بەلگىلەنگەن تالاپتارعا سايكەس كەلمەيتىنى انىقتالعان.
الماتىدا اي-100-ك5-ەۆرو بەنزينىنىڭ ناقتى وكتان سانى 99 بولعان. ال نورماتيۆ بويىنشا بۇل كورسەتكىش كەمىندە 100 بولۋى كەرەك. سونىمەن قاتار بەنزين قۇرامىنداعى كۇكىرتتىڭ ماسسالىق ۇلەسى 33 مگ/كگ بولىپ، رۇقسات ەتىلگەن شەكتى مولشەردەن – 10 مگ/كگ-نان اسىپ كەتكەن.
قىزىلوردا وبلىسىندا اي-95-ك4 بەنزينىنىڭ وكتان سانى 92 بولىپ شىققان. ال جەتىسۋ وبلىسىندا اي-92-ك4 بەنزينىنىڭ قۇرامىنداعى كۇكىرتتىڭ ماسسالىق ۇلەسى 105 مگ/كگ بولعان. بۇل رەتتە بەلگىلەنگەن نورما 50 مگ/كگ-نان اسپاۋى ءتيىس.
انىقتالعان زاڭ بۇزۋشىلىقتارعا بايلانىستى جەدەل شارالار قابىلداندى. اتاپ ايتقاندا، جەتىسۋ وبلىسىندا اكىمشىلىك ءىس قوزعالىپ، ناتيجەسىندە 195 اەك، ياعني 843,4 مىڭ تەڭگە كولەمىندە ايىپپۇل سالىندى.
وكتان سانى بويىنشا تالاپقا سايكەس كەلمەگەن جاعدايلارعا بايلانىستى اۋماقتىق دەپارتامەنتتەر جالپى قۇنى 5,76 ملن تەڭگە بولاتىن بەنزين پارتيالارىن اينالىمعا شىعارۋعا تىيىم سالۋ تۋرالى قاۋلى شىعارعان.
قازىرگى ۋاقىتتا اۋماقتىق دەپارتامەنتتەردىڭ قاراۋىندا جانارماي ساپاسىنا قاتىستى 12 ءوتىنىش بار. ونىڭ توعىزى استانا قالاسىنا، بىرەۋى پاۆلودار وبلىسىنا، ەكەۋى سولتۇستىك قازاقستان وبلىسىنا قاتىستى.
مينيسترلىكتىڭ مالىمەتىنشە، تالاپتاردى بۇزعانى ءۇشىن قر اكىمشىلىك قۇقىق بۇزۋشىلىق تۋرالى كودەكسىنىڭ 415-1-بابىندا جاۋاپكەرشىلىك قاراستىرىلعان. العاش رەت زاڭ بۇزعاندارعا تۇلعانىڭ ساناتىنا قاراي 90-نان 600 اەك-كە دەيىن، ياعني 2026 جىلى 389,2 مىڭ تەڭگەدەن 2,6 ملن تەڭگەگە دەيىن ايىپپۇل سالىنادى. سونىمەن قاتار سايكەستىكتى راستاۋ جونىندەگى ساراپشى-اۋديتوردىڭ اتتەستاتى، سايكەستىكتى راستاۋ قۇجاتى جانە ولشەم قۇرالدارىن تەكسەرۋشى ماماننىڭ سەرتيفيكاتى التى ايعا دەيىن توقتاتىلادى.
زاڭ بۇزۋشىلىق ءبىر جىل ىشىندە قايتالانسا، 150-دەن 1000 اەك-كە دەيىن، ياعني 648,7 مىڭ تەڭگەدەن 4,3 ملن تەڭگەگە دەيىن ايىپپۇل سالىنىپ، اتالعان قۇجاتتاردان ايىرۋ شاراسى قولدانىلۋى مۇمكىن.
ساۋدا جانە ينتەگراتسيا مينيسترلىگى بەنزين ساپاسىن مۇناي وڭدەۋ زاۋىتىنان باستاپ جانارماي قۇيۋ ستانتسيالارىنا دەيىنگى بۇكىل تىزبەك بويىنشا تەكسەرىپ جاتىر. ۆەدومستۆو ازاماتتاردىڭ وتىنىشتەرىن قاراستىرىپ، ءارتۇرلى وڭىرلەردەگى ءوندىرىس ورىندارى مەن 17 جانارماي قۇيۋ ستانتسياسىندا تەكسەرۋ جۇرگىزگەن.
قازاقستاندا بەنزين ساپاسىن باعالاۋ كەزىندە وكتان سانى، قورعاسىن كونتسەنتراتسياسى، كۇكىرتتىڭ ماسسالىق ۇلەسى، شايىر مولشەرى، بەنزول مەن كومىرسۋتەكتەردىڭ كولەمدىك ۇلەسى جانە باسقا دا كورسەتكىشتەر تەكسەرىلەدى. بۇل رەتتە اۋماقتىق دەپارتامەنتتەر ءونىمدى تىكەلەي ساتۋ كەزەڭىندە، ياعني جانارماي قۇيۋ ستانتسيالارىندا باقىلايدى.
