سەمەيدە پوليتسيا قىزمەتكەرلەرى جالعان مەملەكەتتىك نومىرمەن جۇرگەن اۆتوكولىكتى انىقتادى، دەپ حابارلايدى «ادىرنا» ءتىلشىسى.
اتىراۋ وبلىسىنىڭ تۇرعىنى ءوزى جول ەرەجەسىن بۇزباسا دا ايىپپۇلدار كەلە باستاعانىن حابارلاعان. اباي وبلىسى پوليتسيا دەپارتامەنتى اكىمشىلىك پوليتسيا باسقارماسىنىڭ ىزدەستىرۋ توبى جەدەل شارالار ۇيىمداستىرىپ، 33 جاستاعى سەمەي تۇرعىنىنىڭ باسقا ايماق تۇرعىنىنا تيەسىلى ءنومىردى قولدانعانىن انىقتاعان. ەر ادام BMW X5 اۆتوكولىگىن باسقا ادامنىڭ مەملەكەتتىك نومىرىمەن جۇرگىزگەن. ناتيجەسىندە بارلىق ايىپپۇلدار ءنومىردىڭ ناقتى يەسىنە كەلىپ وتىرعان.
«پوليتسيا بۇل ارەكەتتى جول قاۋىپسىزدىگى مەن تارتىپكە تىكەلەي قاۋىپ توندىرەتىن قاساقانا ءنومىر اۋىستىرۋ دەپ باعالادى. بۇزۋشىلىق فاكتىسى راستالدى. اۆتوكولىك ارنايى ايىپ تۇراعىنا قويىلدى، قۇجاتتار بەلگىلەنگەن تارتىپپەن راسىمدەلدى»،-دەلىنگەن حابارلامادا.
ايتا كەتەيىك، جالعان مەملەكەتتىك ءنومىردى قولدانعانى ءۇشىن زاڭ بويىنشا 15 اەك كولەمىندە ايىپپۇل، اكىمشىلىك قاماق — 5 كۇنگە دەيىن جانە كولىك باسقارۋ قۇقىعىنان 1 جىلعا ايىرۋ جازاسى قاراستىرىلعان.
«مەملەكەتتىك ءنومىر — "قوسالقى بولشەك" ەمەس، ول كولىكتىڭ زاڭدى يدەنتيفيكاتورى. جەكە بۇزۋشىنى جاسىرۋ نەمەسە جاۋاپكەرشىلىكتى باسقا ادامعا اۋدارۋ ارەكەتتەرى انىقتالادى، جانە كىنالىلەرگە زاڭدا كوزدەلگەن شارالار قولدانىلاتىن بولادى»،-دەپ تولىقتىردى پد.
