قازاقستاندا 12 ناۋرىزدان باستاپ اكىمشىلىك قۇقىق بۇزۋشىلىق تۋرالى كودەكستىڭ 31-بابىنا ەنگىزىلگەن وزگەرىستەر كۇشىنە ەنەدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەپ.
بۇل تۋرالى قازاقستاننىڭ ىشكى ىستەر مينيسترلىگى مالىمدەدى.
ۆەدومستۆونىڭ تۇسىندىرۋىنشە، وزگەرىستەر «تسيفرلىق كودەكس» اياسىندا قابىلدانعان جانە ولاردىڭ نەگىزگى ماقساتى – زاماناۋي تەحنولوگيالاردى قولدانۋ ارقىلى جول قاۋىپسىزدىگىن ارتتىرۋ جانە قۇقىق بۇزۋشىلىقتاردىڭ الدىن الۋ.
ءىىم وكىلدەرى جاڭا تىيىمدار ەنگىزىلمەيتىنىن اتاپ ءوتتى. وزگەرىستەر تەك بۇرىننان بار قۇقىق بۇزۋشىلىقتاردى انىقتاۋ تاسىلدەرىن جەتىلدىرۋگە باعىتتالعان.
"بۇعان دەيىن كەيبىر بۇزۋشىلىقتاردى تەك پوليتسيا قىزمەتكەرلەرى انىقتاسا، ەندى ولاردى زاماناۋي تەحنيكالىق قۇرالدار ارقىلى تىركەۋگە بولادى. زاڭ تالاپتارى وزگەرمەيدى، تەك تىركەۋ ادىستەرى جاڭارتىلادى", – دەدى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
جاڭاشىلدىقتارعا سايكەس، قۇقىق بۇزۋشىلىقتاردى تىركەۋدىڭ ءۇش ءتاسىلى قاراستىرىلعان.
العاشقىسى قولدانىستاعى بەينەباقىلاۋ كامەرالارى بولسا، ەكىنشى اۆتوماتتى تىركەۋ جۇيەلەرى. ياعني، رولدە تەلەفون پايدالانۋ نەمەسە قاۋىپسىزدىك بەلدىگىن تاقپاۋ فاكتىلەرىن انىقتاي الادى.
سونىمەن قاتار، ەسكەرتۋ تۇرىندە قاراستىرىلعان كەيبىر قۇقىق بۇزۋشىلىقتار بويىنشا جۇيە اۆتوماتتى تۇردە ەسكەرتۋ شىعارا الادى.
