«قاراشىعاناق پەتروليۋم وپەرەيتينگ ب.ۆ.» كومپانياسىنا نورمادان تىس ەميسسيالار فاكتىسى بويىنشا جوسپاردان تىس تەكسەرىس جۇرگىزىلدى. بۇل تۋرالى باتىس قازاقستان وبلىسى ەكولوگيا دەپارتامەنتى ايتتى، دەپ حابارلايدى «ادىرنا» ءتىلشىسى.
تەكسەرىس ناتيجەسى بويىنشا 2024 جىلى كومپانيا اتموسفەرالىق اۋاعا 13,84 توننا بەلگىلەنگەن نورمادان ارتىق شىعارىندىلار جانە 0,05134355 توننا بەلگىلەنگەن نورمادان ارتىق سارقىندى سۋ توگىندىلەرىنە جول بەرگەندىگى انىقتالعان.
«اتالعان فاكتىلەر بويىنشا «كپو ب.ۆ.» كومپانياسى ەكولوگيالىق كودەكستىڭ 39, 106, 202 جانە 216 باپتارىنىڭ تالاپتارىن بۇزعانى ءۇشىن قر اكىمشىلىك قۇقىق بۇزۋشىلىق تۋرالى كودەسىنىڭ 328 بابىنىڭ 1 جانە 2 بولىكتەرىمەن جالپى سوماسى 2 077 749,9 مىڭ تەڭگە مولشەرىندە ايىپپۇل تۇرىندە اكىمشىلىك جاۋاپكەرشىلىككە تارتىلدى. قازىرگى ۋاقىتتا ايىپپۇلدى ءوندىرىپ الۋ شارالارى جۇرگىزىلۋدە»،-دەلىنگەن حابارلامادا.
دەپارتامەنت نورماتيۆتەن تىس شىعارىندىلار مەن توگىندىلەردىڭ سەبەپتەرىن تالداۋ جۇرگىزۋدى، سونداي-اق نورماتيۆتەن تىس ەميسسيالاردى بولدىرماۋعا باعىتتالعان ءىس-شارالاردى ازىرلەۋگە نۇسقاما بەرگەن.
