Qazaqstanda oktan sany men kükırt mölşerı belgılengen talaptarǧa säikes kelmegen benzindı satuǧa tyiym salyndy. Būl turaly LS basylymy Sauda jäne integrasiia ministrlıgıne sılteme jasap jazdy, dep habarlaidy “Adyrna”.
Vedomstvonyŋ mälımetınşe, 2026 jyly Tehnikalyq retteu jäne metrologiia komitetınıŋ aumaqtyq departamentterı janarmai qūiu stansiialarynda 55 baqylau ıs-şarasyn jürgızgen. Onyŋ ışınde jospardan tys tekseruler, profilaktikalyq baqylau jäne baqylau maqsatynda satyp alu şaralary bar. Nätijesınde benzinnıŋ 22 ülgısı alynyp, üş jaǧdaida belgılengen talaptarǧa säikes kelmeitını anyqtalǧan.
Almatyda Aİ-100-K5-Evro benzinınıŋ naqty oktan sany 99 bolǧan. Al normativ boiynşa būl körsetkış kemınde 100 boluy kerek. Sonymen qatar benzin qūramyndaǧy kükırttıŋ massalyq ülesı 33 mg/kg bolyp, rūqsat etılgen şektı mölşerden – 10 mg/kg-nan asyp ketken.
Qyzylorda oblysynda Aİ-95-K4 benzinınıŋ oktan sany 92 bolyp şyqqan. Al Jetısu oblysynda Aİ-92-K4 benzinınıŋ qūramyndaǧy kükırttıŋ massalyq ülesı 105 mg/kg bolǧan. Būl rette belgılengen norma 50 mg/kg-nan aspauy tiıs.
Anyqtalǧan zaŋ būzuşylyqtarǧa bailanysty jedel şaralar qabyldandy. Atap aitqanda, Jetısu oblysynda äkımşılık ıs qozǧalyp, nätijesınde 195 AEK, iaǧni 843,4 myŋ teŋge kölemınde aiyppūl salyndy.
Oktan sany boiynşa talapqa säikes kelmegen jaǧdailarǧa bailanysty aumaqtyq departamentter jalpy qūny 5,76 mln teŋge bolatyn benzin partiialaryn ainalymǧa şyǧaruǧa tyiym salu turaly qauly şyǧarǧan.
Qazırgı uaqytta aumaqtyq departamentterdıŋ qarauynda janarmai sapasyna qatysty 12 ötınış bar. Onyŋ toǧyzy Astana qalasyna, bıreuı Pavlodar oblysyna, ekeuı Soltüstık Qazaqstan oblysyna qatysty.
Ministrlıktıŋ mälımetınşe, talaptardy būzǧany üşın QR Äkımşılık qūqyq būzuşylyq turaly kodeksınıŋ 415-1-babynda jauapkerşılık qarastyrylǧan. Alǧaş ret zaŋ būzǧandarǧa tūlǧanyŋ sanatyna qarai 90-nan 600 AEK-ke deiın, iaǧni 2026 jyly 389,2 myŋ teŋgeden 2,6 mln teŋgege deiın aiyppūl salynady. Sonymen qatar säikestıktı rastau jönındegı sarapşy-auditordyŋ attestaty, säikestıktı rastau qūjaty jäne ölşem qūraldaryn tekseruşı mamannyŋ sertifikaty alty aiǧa deiın toqtatylady.
Zaŋ būzuşylyq bır jyl ışınde qaitalansa, 150-den 1000 AEK-ke deiın, iaǧni 648,7 myŋ teŋgeden 4,3 mln teŋgege deiın aiyppūl salynyp, atalǧan qūjattardan aiyru şarasy qoldanyluy mümkın.
Sauda jäne integrasiia ministrlıgı benzin sapasyn mūnai öŋdeu zauytynan bastap janarmai qūiu stansiialaryna deiıngı bükıl tızbek boiynşa tekserıp jatyr. Vedomstvo azamattardyŋ ötınışterın qarastyryp, ärtürlı öŋırlerdegı öndırıs oryndary men 17 janarmai qūiu stansiiasynda tekseru jürgızgen.
Qazaqstanda benzin sapasyn baǧalau kezınde oktan sany, qorǧasyn konsentrasiiasy, kükırttıŋ massalyq ülesı, şaiyr mölşerı, benzol men kömırsutekterdıŋ kölemdık ülesı jäne basqa da körsetkışter tekserıledı. Būl rette aumaqtyq departamentter önımdı tıkelei satu kezeŋınde, iaǧni janarmai qūiu stansiialarynda baqylaidy.
