2026 jylǧy egın jinau nauqanynyŋ qorytyndysy boiynşa Qazaqstanda 24,3 mln tonna astyq jinaldy.
Būl — soŋǧy 15 jyldaǧy eŋ joǧary körsetkışterdıŋ bırı. Osy uaqyt aralyǧynda mūndai nätijeden joǧary körsetkış tek ekı ret tırkelgen.
Būl nätije otandyq auyl şaruaşylyǧynyŋ mümkındıgı joǧary ekenın jäne diqandardyŋ eldı azyq-tülıkpen qamtamasyz etuge qosqan ülesın körsetedı.
Biyl jinalǧan astyqtyŋ kölemı ǧana emes, sapasy da jaqsy. Aldyn ala mälımetter boiynşa, elevatorlarǧa tapsyrylǧan jūmsaq bidaidyŋ şamamen 72%-y üşınşı synypqa jatady. Zerttelgen bidai ülgılerınıŋ 48%-ynda dän maŋyzynyŋ mölşerı 28%-dan joǧary. Aqmola oblysynda üşınşı synypty bidaidyŋ ülesı 90%-ǧa, al aquyzy joǧary Hi-Pro sanatyndaǧy bidaidyŋ ülesı 70%-ǧa jettı.
Astyq sapasynyŋ joǧary boluy ony azyq-tülık öndıruge keŋınen paidalanuǧa, öŋdeu käsıporyndaryn damytuǧa jäne qazaqstandyq önımnıŋ şeteldık naryqtardaǧy bäsekege qabılettılıgın arttyruǧa mümkındık beredı.
Qazaqstan astyq eksportynda da joǧary nätijeler körsetıp otyr. Soŋǧy ekı marketingtık jylda elımız 15,5 mln jäne 16 mln tonna astyq pen ūn eksporttady. Būl — täuelsızdık jyldaryndaǧy rekordtyq körsetkışter.
«Qazaqstan temır joly» ŪK» AQ mälımetınşe, 2026 jylǧy qyrküiekten 19 qazanǧa deiın Qazaqstan 1,657 mln tonna astyq eksporttaǧan. Būl ötken kezeŋmen salystyrǧanda 9%-ǧa köp.
Auyl şaruaşylyǧynyŋ önımdılıgın arttyru üşın memleket agrarşylardy qoldau jäne salany jaŋǧyrtu jūmystaryn jalǧastyryp keledı. Atap aitqanda, şarualarǧa jeŋıldetılgen nesie beru, auyl şaruaşylyǧy tehnikasyn jaŋartu, sapaly tūqymdar men mineraldy tyŋaitqyştardy jetkızu, zamanaui tehnologiialardy engızu jūmystaryna basymdyq berılude. Sonymen qatar jer men sudy tiımdı paidalanu jäne klimattyŋ özgeruıne beiımdelu mäselelerıne köŋıl bölınude.
Soŋǧy üş jylda mineraldy tyŋaitqyştardy qoldanu kölemı üş esege juyq östı. 2025 jyly şarualar 1,8 mln tonna tyŋaitqyş paidalanǧan. Al 2026 jyly josparlanǧan 2,3 mln tonnanyŋ 2,1 mln tonnasy egıstıkke engızıldı. Sapaly elitalyq tūqymdardyŋ ülesı 12%-ǧa jettı. Būl aldaǧy uaqytta önım kölemı men sapasyn arttyruǧa yqpal etedı.
Biyl egın jinau jūmystaryna 130 myŋnan astam traktor, 29 myŋ astyq jinaityn kombain, 17 myŋ jatka jäne basqa da 130 myŋǧa juyq auyl şaruaşylyǧy tehnikasy jūmyldyryldy.
Auyl şaruaşylyǧy tehnikasyn jaŋartu nätijesınde onyŋ tozu deŋgeiı 2023 jylǧy 85%-dan 2025 jyly 65%-ǧa deiın tömendedı. 2026 jyldyŋ qorytyndysy boiynşa tehnikany jaŋartu deŋgeiın 8%-ǧa jetkızu josparlanyp otyr.
Şarualarǧa tehnika satyp aluǧa jeŋıldetılgen lizing baǧdarlamasy da kömektesude. Baǧdarlama bastalǧaly berı agrarşylar 12,7 myŋnan astam traktor men 2 340 astyq jinaityn kombain satyp aldy. Bügınde osy baǧdarlama arqyly alynǧan tehnika elımızdegı traktorlar men astyq jinaityn kombaindardyŋ jalpy sanynyŋ şamamen 10%-yn qūraidy.
Aldaǧy uaqytta auyl şaruaşylyǧyndaǧy negızgı mındetter — önım kölemın arttyru, astyq sapasyn jaqsartu, zamanaui tehnologiialardy keŋınen engızu jäne şarualardy qajettı tehnikamen, tūqymmen, tyŋaitqyşpen qamtamasyz etu.
Būl jūmystar auyl şaruaşylyǧynyŋ tūraqty damuyna, klimattyq özgerıster men syrtqy qiyndyqtarǧa tötep beruıne jäne elımızdıŋ eksporttyq äleuetın arttyruǧa mümkındık beredı.
