ۋكراينا، يتاليا جانە ەستونيانىڭ اۋسترالياداعى ەلشىلەرىنىڭ جۇبايلارى كانبەرراداعى حالىقارالىق ايەلدەر كلۋبىنىڭ قۇرامىنان شىقتى، دەپ حابارلايدى "ادىرنا" ۇلتتىق پورتالى Strana.ua-عا سىلتەپ.
بۇعان رەسەي ەلشىسىنىڭ جۇبايى يرينا پەتراكوۆا كلۋب مۇشەلىگىنە قابىلدانۋى سەبەپ بولعان.
كلۋب پرەزيدەنتىنىڭ ايتۋىنشا، يرينا پەتراكوۆادان ونىڭ شىققان ەلىنە بايلانىستى مۇشەلىكتەن باس تارتۋ كەمسىتۋشىلىككە قارسى زاڭنامانى بۇزۋ بولىپ سانالار ەدى. سوندىقتان ول كلۋب قۇرامىنا قابىلدانعان.
ال ۋكراينا ەلشىسىنىڭ جۇبايى ليانا ميروشنيچەنكو كلۋب مۇشەلەرىنە جولداعان ەلەكتروندىق حاتىندا قارسىلىعى پەتراكوۆامەن ونىڭ ۇلتىنا بايلانىستى ەمەس، رەسەيدىڭ وكىلى رەتىندەگى مارتەبەسىنە قاتىستى ەكەنىن تۇسىندىرگەن.
ول رەسەيدىڭ ۋكرايناعا قارسى سوعىسى سالدارىنان جاقىندارى مەن دوستارىنان ايىرىلعانىن ايتىپ، مۇنداي جاعدايدا رەسەي ديپلوماتىنىڭ جۇبايىمەن ءبىر كلۋبتا بولۋدى قابىلداي المايتىنىن جەتكىزگەن.
ەو اۋسترالياداعى ەلشىسى لوۋرەنس مەرەديت Politico باسىلىمىنا بەرگەن سۇحباتىندا حالىقارالىق ايەلدەر كلۋبىنىڭ يرينا پەتراكوۆنى مۇشەلىككە قابىلداۋ تۋرالى شەشىمىنە ەو ەلدەرى «قاتتى كوڭىلى قالعانىن» ايتقان. الايدا ول بۇل ماسەلەگە بايلانىستى قانداي دا ءبىر ناقتى شارا كوزدەلگەن-كوزدەلمەگەنىن ايتپادى.
كانبەرراداعى حالىقارالىق ايەلدەر كلۋبى ديپلوماتتاردىڭ جۇبايلارى مەن ءتۇرلى ەلدەردىڭ ايەل وكىلدەرىن بىرىكتىرەدى. ۇيىم مادەني جانە قايىرىمدىلىق ءىس-شارالارىن وتكىزەدى. كلۋب مۇشەلىگى ەرىكتى نەگىزدە جۇزەگە اسىرىلادى.
رەسەي مەن ەۋروپالىق وداق ەلدەرىنىڭ قارىم-قاتىناسى ءالى دە كۇردەلى. ەۋروپانىڭ بىرقاتار مەملەكەتى رەسەي ديپلوماتتارىمەن بايلانىسىن شەكتەگەن. الايدا اۆستراليادا مۇنداي شەكتەۋلەر ايەلدەر كلۋبتارى دەڭگەيىندە ەنگىزىلمەگەن.
