قىرىمنىڭ كەرچ قالاسىندا جۇك كولىگىن ۆيدەوعا تۇسىرگەن جەرگىلىكتى تۇرعىن قۇقىق قورعاۋ ورگاندارى تاراپىنان ۇستالدى، دەپ حابارلايدى "ادىرنا" ۇلتتىق پورتالى.
ريا دەرەگىنشە، ول اسكەري ماقساتتا پايدالانىلعان بولۋى مۇمكىن كولىك تۋرالى اقپاراتتى جاريالاپ، ونىڭ ورنالاسۋى مەن ەرەكشەلىكتەرىن اشكەرەلەدى دەگەن كۇدىككە ىلىنگەن.
قىرىم باسشىسى كەڭەسشىسى ولەگ كريۋچكوۆتىڭ ايتۋىنشا، ازامات «اسكەري قىزمەتكەرلەردىڭ ارەكەتتەرىن اشكەرەلەپ، ولاردىڭ قولداناتىن تاسىلدەرى تۋرالى مالىمەت تاراتتى» دەپ ايىپتالۋدا. بيلىك وكىلدەرىنىڭ مالىمدەۋىنشە، مۇنداي اقپاراتتىڭ جاريالانۋى وڭىردەگى قاۋىپسىزدىك شارالارىنا كەرى اسەر ەتۋى مۇمكىن.
وقيعاعا سەبەپ بولعان ۆيدەو 12 ماۋسىم كۇنى الەۋمەتتىك جەلىلەردە تاراعان. كادرلاردا سىرتقى كورىنىسى قاراپايىم جۇك كولىگىنە ۇقساس، الايدا جانارماي تاسىمالداۋعا ارنالعان ارنايى كولىك بەينەلەنگەن. ۆيدەو اۆتورى كادر سىرتىندا ونىڭ اسكەري ماقساتتاعى بەنزوۆوز ەكەنىن ايتقان.
رەسەيلىك اقپارات قۇرالدارىنىڭ حابارلاۋىنشا، قازىرگى ۋاقىتتا قۇقىق قورعاۋ ورگاندارى ازاماتتىڭ ارەكەتىنە قۇقىقتىق باعا بەرۋ ءۇشىن دالەلدەر جيناپ جاتىر. الايدا وعان ناقتى قانداي باپ بويىنشا ايىپ تاعىلۋى مۇمكىن ەكەنى ازىرگە جاريالانعان جوق.
وقيعاعا قاتىستى رەسمي تەرگەۋ امالدارى جالعاسۋدا.
