Қырымның Керчь қаласында жүк көлігін видеоға түсірген жергілікті тұрғын құқық қорғау органдары тарапынан ұсталды, деп хабарлайды "Адырна" ұлттық порталы.
РИА дерегінше, ол әскери мақсатта пайдаланылған болуы мүмкін көлік туралы ақпаратты жариялап, оның орналасуы мен ерекшеліктерін әшкереледі деген күдікке ілінген.
Қырым басшысы кеңесшісі Олег Крючковтың айтуынша, азамат «әскери қызметкерлердің әрекеттерін әшкерелеп, олардың қолданатын тәсілдері туралы мәлімет таратты» деп айыпталуда. Билік өкілдерінің мәлімдеуінше, мұндай ақпараттың жариялануы өңірдегі қауіпсіздік шараларына кері әсер етуі мүмкін.
Оқиғаға себеп болған видео 12 маусым күні әлеуметтік желілерде тараған. Кадрларда сыртқы көрінісі қарапайым жүк көлігіне ұқсас, алайда жанармай тасымалдауға арналған арнайы көлік бейнеленген. Видео авторы кадр сыртында оның әскери мақсаттағы бензовоз екенін айтқан.
Ресейлік ақпарат құралдарының хабарлауынша, қазіргі уақытта құқық қорғау органдары азаматтың әрекетіне құқықтық баға беру үшін дәлелдер жинап жатыр. Алайда оған нақты қандай бап бойынша айып тағылуы мүмкін екені әзірге жарияланған жоқ.
Оқиғаға қатысты ресми тергеу амалдары жалғасуда.
