Финляндияда сулы-батпақты аумақтарды қалпына келтіру қорғаныс қабілетін күшейтудің ықтимал элементі ретінде де қарастырылып жатыр, деп хабарлайды "Адырна" тілшісі.
Le Monde басылымының мәліметінше, фин мамандары батпақты аумақтар ықтимал қақтығыс жағдайында әскери техниканың қозғалысын қиындатуы мүмкін деп есептейді.
Қазір Финляндияда шамамен 180 мың гектар сулы-батпақты жерді қалпына келтіру мүмкіндігі бар. Бұған дейін ауыл шаруашылығы, орман өнеркәсібі және энергетика салалары үшін құрғатылған 4,7 миллион гектар батпақты аумақтың шамамен 60 мың гектары қалпына келтірілген.
Бастамаға Шығыс бағытынан төнуі мүмкін қауіптерге қатысты алаңдаушылықтың артуы аясында ерекше назар аударылып отыр. Финляндияның Ресеймен ортақ шекарасының ұзындығы шамамен 1 340 шақырымды құрайды.
Финляндия армиясының өкілдері табиғи кедергілер, соның ішінде батпақтар мен ормандар, ықтимал қарсыластың қозғалыс бағыттарын шектеп, қорғаныс операцияларын жоспарлауға әсер етуі мүмкін екенін атап өтті.
Ал қоршаған ортаны қорғау министрлігінің мәліметінше, әскери сала өкілдері бастапқыда бұл бастамаға сақтықпен қараған. Кейін экологиялық мақсаттарды қорғаныс міндеттерімен ұштастыру мүмкіндігі қолдау тапқан.
