فينليانديادا سۋلى-باتپاقتى اۋماقتاردى قالپىنا كەلتىرۋ قورعانىس قابىلەتىن كۇشەيتۋدىڭ ىقتيمال ەلەمەنتى رەتىندە دە قاراستىرىلىپ جاتىر، دەپ حابارلايدى "ادىرنا" ءتىلشىسى.
Le Monde باسىلىمىنىڭ مالىمەتىنشە، فين ماماندارى باتپاقتى اۋماقتار ىقتيمال قاقتىعىس جاعدايىندا اسكەري تەحنيكانىڭ قوزعالىسىن قيىنداتۋى مۇمكىن دەپ ەسەپتەيدى.
قازىر فينليانديادا شامامەن 180 مىڭ گەكتار سۋلى-باتپاقتى جەردى قالپىنا كەلتىرۋ مۇمكىندىگى بار. بۇعان دەيىن اۋىل شارۋاشىلىعى، ورمان ونەركاسىبى جانە ەنەرگەتيكا سالالارى ءۇشىن قۇرعاتىلعان 4,7 ميلليون گەكتار باتپاقتى اۋماقتىڭ شامامەن 60 مىڭ گەكتارى قالپىنا كەلتىرىلگەن.
باستاماعا شىعىس باعىتىنان ءتونۋى مۇمكىن قاۋىپتەرگە قاتىستى الاڭداۋشىلىقتىڭ ارتۋى اياسىندا ەرەكشە نازار اۋدارىلىپ وتىر. فينليانديانىڭ رەسەيمەن ورتاق شەكاراسىنىڭ ۇزىندىعى شامامەن 1 340 شاقىرىمدى قۇرايدى.
فينليانديا ارمياسىنىڭ وكىلدەرى تابيعي كەدەرگىلەر، سونىڭ ىشىندە باتپاقتار مەن ورماندار، ىقتيمال قارسىلاستىڭ قوزعالىس باعىتتارىن شەكتەپ، قورعانىس وپەراتسيالارىن جوسپارلاۋعا اسەر ەتۋى مۇمكىن ەكەنىن اتاپ ءوتتى.
ال قورشاعان ورتانى قورعاۋ مينيسترلىگىنىڭ مالىمەتىنشە، اسكەري سالا وكىلدەرى باستاپقىدا بۇل باستاماعا ساقتىقپەن قاراعان. كەيىن ەكولوگيالىق ماقساتتاردى قورعانىس مىندەتتەرىمەن ۇشتاستىرۋ مۇمكىندىگى قولداۋ تاپقان.
