Бүгін көрнекті тілші ғалым, академик Өмірзақ Айтбаевтың туғанына 90 жыл толып отыр. Қазақ тіл білімінің дамуына зор үлес қосқан тұлғаның ғылыми мұрасы мен қоғамдық қызметі бүгінгі күні де жоғары бағаланып келеді.
Өмірзақ Айтбаев 1936 жылы 5 сәуірде Оңтүстік Қазақстан облысы, Түркістан өңірінде дүниеге келген. Ол – филология ғылымдарының докторы, профессор, Қазақстан Республикасы Ғылым академиясының корреспондент-мүшесі, сондай-ақ Әлеуметтік ғылымдар академиясының академигі.
Ғалым еңбек жолын 1959–1962 жылдары «Социалистік Қазақстан» газетінде әдеби қызметкер ретінде бастаған. Кейін 1962 жылдан бастап Қазақстан Ғылым академиясының Тіл білімі институтында ұзақ жылдар бойы қызмет атқарып, кіші ғылыми қызметкерден бастап, бөлім меңгерушісі және бас ғылыми қызметкер деңгейіне дейін көтерілді. Бұл кезеңде ол қазақ тіл білімінің түрлі бағыттарын дамытуға белсене араласты.
Сонымен қатар, жоғары білім беру саласында да жемісті еңбек етті. Әртүрлі жылдары Қазақ мемлекеттік қыздар педагогикалық институтында, Қожа Ахмет Ясауи атындағы Халықаралық қазақ-түрік университетінда профессор қызметін атқарды. 1999 жылдан бастап «Қайнар» университетінде факультет деканы болып, жас мамандар даярлауға үлес қосты. Сондай-ақ, Қазақстан Республикасының Білім және ғылым министрлігіне қарасты Тіл білімі институтының Терминологиялық орталығын басқарды.
Ғалымның қоғамдық қызметі де айрықша назар аударуға тұрарлық. 1989 жылдан бастап Қазақ тілі халықаралық қоғамында вице-президент, кейін бірінші президент және президент қызметтерін атқарды. Бұл ұйым арқылы ол мемлекеттік тілдің мәртебесін көтеруге бағытталған маңызды бастамалардың жүзеге асуына ықпал етті.
Өмірзақ Айтбаевтың еңбегі мемлекет тарапынан жоғары бағаланып, ол «Құрмет» және «Парасат» ордендерімен марапатталған.
Қазақ тілінің жанашыры атанған ғалымның ғылыми мұрасы мен тіл үшін сіңірген еңбегі ұлт руханиятының маңызды бөлігі ретінде бағаланады. Бүгінде оның есімі мен еңбегі кейінгі ұрпаққа үлгі болып қала береді.
