بۇگىن كورنەكتى ءتىلشى عالىم، اكادەميك ومىرزاق ايتباەۆتىڭ تۋعانىنا 90 جىل تولىپ وتىر. قازاق ءتىل ءبىلىمىنىڭ دامۋىنا زور ۇلەس قوسقان تۇلعانىڭ عىلىمي مۇراسى مەن قوعامدىق قىزمەتى بۇگىنگى كۇنى دە جوعارى باعالانىپ كەلەدى.
ومىرزاق ايتباەۆ 1936 جىلى 5 ساۋىردە وڭتۇستىك قازاقستان وبلىسى، تۇركىستان وڭىرىندە دۇنيەگە كەلگەن. ول – فيلولوگيا عىلىمدارىنىڭ دوكتورى، پروفەسسور، قازاقستان رەسپۋبليكاسى عىلىم اكادەمياسىنىڭ كوررەسپوندەنت-مۇشەسى، سونداي-اق الەۋمەتتىك عىلىمدار اكادەمياسىنىڭ اكادەميگى.
عالىم ەڭبەك جولىن 1959–1962 جىلدارى «سوتسياليستىك قازاقستان» گازەتىندە ادەبي قىزمەتكەر رەتىندە باستاعان. كەيىن 1962 جىلدان باستاپ قازاقستان عىلىم اكادەمياسىنىڭ ءتىل ءبىلىمى ينستيتۋتىندا ۇزاق جىلدار بويى قىزمەت اتقارىپ، كىشى عىلىمي قىزمەتكەردەن باستاپ، ءبولىم مەڭگەرۋشىسى جانە باس عىلىمي قىزمەتكەر دەڭگەيىنە دەيىن كوتەرىلدى. بۇل كەزەڭدە ول قازاق ءتىل ءبىلىمىنىڭ ءتۇرلى باعىتتارىن دامىتۋعا بەلسەنە ارالاستى.
سونىمەن قاتار، جوعارى ءبىلىم بەرۋ سالاسىندا دا جەمىستى ەڭبەك ەتتى. ءارتۇرلى جىلدارى قازاق مەملەكەتتىك قىزدار پەداگوگيكالىق ينستيتۋتىندا، قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندا پروفەسسور قىزمەتىن اتقاردى. 1999 جىلدان باستاپ «قاينار» ۋنيۆەرسيتەتىندە فاكۋلتەت دەكانى بولىپ، جاس ماماندار دايارلاۋعا ۇلەس قوستى. سونداي-اق، قازاقستان رەسپۋبليكاسىنىڭ ءبىلىم جانە عىلىم مينيسترلىگىنە قاراستى ءتىل ءبىلىمى ينستيتۋتىنىڭ تەرمينولوگيالىق ورتالىعىن باسقاردى.
عالىمنىڭ قوعامدىق قىزمەتى دە ايرىقشا نازار اۋدارۋعا تۇرارلىق. 1989 جىلدان باستاپ قازاق ءتىلى حالىقارالىق قوعامىندا ۆيتسە-پرەزيدەنت، كەيىن ءبىرىنشى پرەزيدەنت جانە پرەزيدەنت قىزمەتتەرىن اتقاردى. بۇل ۇيىم ارقىلى ول مەملەكەتتىك ءتىلدىڭ مارتەبەسىن كوتەرۋگە باعىتتالعان ماڭىزدى باستامالاردىڭ جۇزەگە اسۋىنا ىقپال ەتتى.
ومىرزاق ايتباەۆتىڭ ەڭبەگى مەملەكەت تاراپىنان جوعارى باعالانىپ، ول «قۇرمەت» جانە «پاراسات» وردەندەرىمەن ماراپاتتالعان.
قازاق ءتىلىنىڭ جاناشىرى اتانعان عالىمنىڭ عىلىمي مۇراسى مەن ءتىل ءۇشىن سىڭىرگەن ەڭبەگى ۇلت رۋحانياتىنىڭ ماڭىزدى بولىگى رەتىندە باعالانادى. بۇگىندە ونىڭ ەسىمى مەن ەڭبەگى كەيىنگى ۇرپاققا ۇلگى بولىپ قالا بەرەدى.
