Колумбиялық әнші Шакира демалысын кейінге қалдырып, жер сілкінісінен зардап шеккен Кибдо қаласына барды, деп хабарлайды "Адырна" ұлттық порталы.
Ол аймақтағы жағдаймен танысып, зардап шеккен тұрғындарға көмек көрсетуге ниетті екенін айтты. Шакира қалаға америкалық кәсіпкер Уоррен Баффеттің ұлы Говард Баффетпен бірге барған. Олар табиғи апаттан зардап шеккен аудандарды аралап, гуманитарлық көмек көрсету және өңірдің әлеуметтік инфрақұрылымын қалпына келтіру мәселелерін талқылады.
Әнші апат салдарынан бүлінген Чоко технологиялық университетін толық қалпына келтіруге және қираған білім беру нысандарының орнына 10 жаңа мектеп салуға уәде берді. Бұл мақсатқа алғашқы 1 миллион доллар көлемінде қаражат тартылған. Оның ішінде Global Citizen қозғалысы мен Live Nation концерттік промоутері 500 мың доллардан қаржы бөлмек.
Жобаның негізгі серіктестері ретінде Говард Баффеттің қайырымдылық қоры және Шакираның аймақта 20 жылдан бері гуманитарлық жұмыстар жүргізіп келе жатқан Pies Descalzos қоры белгіленді.
Шакира Канада, Жапония және Ұлыбритания үкіметтеріне, сондай-ақ жеке компаниялар мен халықаралық қорларға Чоко өңірінің әлеуметтік инфрақұрылымын қалпына келтіруге атсалысуға шақырды.
