Ыстанбұлда Эсеньюрт муниципалитетіндегі тендерлерді қолдан жасау және мердігерлерден пара алу ісі бойынша тергеу аясында 17 адам ұсталды. Бұл туралы dpa жазды, деп хабарлайды «Адырна» тілшісі.
Тергеуді Ыстанбұл қаласының Бас республикалық прокуратурасы жүргізіп жатыр. Тергеу мәліметінше, күдіктілер тобы муниципалдық сатып алуларды өткізу кезінде түрлі заңсыз схемаларды ұйымдастырып, келісімшарт алу үшін мердігерлерден ақша талап еткен.
Прокуратура 19 адамды ұстауға санкция берген. Арнайы операция барысында Қаржылық қылмыстармен күрес басқармасының қызметкерлері 17 күдіктіні ұстап, полиция бөлімшесіне жеткізді.
Қазір жасырынып жүрген тағы екі күдіктіні іздестіру жұмыстары жалғасуда. Прокуратура аталған іс бойынша барлық эпизодтарға қатысты тергеудің әлі де жалғасып жатқанын мәлімдеді.
