Канададағы Ванкувер қаласында өткен көше фестивалінде жол талғамайтын көлік адамдар тобына соғылды. Оқиға салдарынан бірнеше адам қаза тапты, деп хабарлайды "Адырна" ұлттық порталы.
CBC News мәліметінше, оқиға 26 сәуір күні кешке Фрейзер-стрит пен Шығыс 41-авеню қиылысында болған. Бұл жерде Лапу-Лапу күніне арналған кеш өтіп жатқан.
"Сенбі кешінде көше фестивалінде көлік адамдар тобына соғылғаннан кейін бірнеше адам қаза тапты, тағы бірнешеуі жарақат алды. Көлік жүргізушісі ұсталды", – деп хабарлады CBC News полицияның мәліметіне сілтеме жасап.
Құқық қорғау органдары тергеу жүріп жатқандықтан, қосымша ақпараттың кейінірек берілетінін атап өтті.
Куәгерлердің айтуынша, жүргізушінің жасы шамамен 20-да болған және ол өзін оғаш ұстаған. Психикалық ауытқуы бар адамға ұқсап көрінген.
