Қытайда әлемдегі ең үлкен жүк көтергіштігі бар автомобиль тасымалдаушы кемесі "Аньцзи Аньшэн" бейсенбі күні кешке Шанхай портынан шығып, алғашқы рейсіне аттанды. Ол Қытайда өндірілген шамамен 7000 автокөлікті Еуропаға тасымалдайды, деп хабарлайды “Адырна” ұлттық порталы Синьхуа агенттігіне сілтеп.
Автотасымалдаушының Шанхайдан кетуі қытайлық кеме жасау үшін жаңа кезең болды, себебі "Аньцзи Аньшэн" жүк көтергіштігі бойынша бірнеше апта бұрын қытайлық автогигант BYD жасаған "Шэньчжэнь" кемесінің орнын басты. Бұған дейін әлемдегі ең үлкен автомобиль тасымалдаушы ретінде "Шэньчжэнь" жұмыс істеп келді.
"Рекордтың бір айдан аз уақыт ішінде қайта жаңаруы Қытайдың орта және жоғары технологиялық өндірісінің қарқынды дамуын ғана емес, сонымен қатар халықаралық жағдайдың қиын болуына қарамастан Қытайдың сыртқы саудасының мықты тұрақтылығы мен тіршілік қабілетін көрсетеді", – деп атап өтті Цинхуа университетінің Мемлекеттік басқару институты директорының орынбасары Гао Юйнин.
SAIC Anji Logistics Co., Ltd. компаниясының бас директоры Чжуан Цзинсюннің айтуынша, "Аньцзи Аньшэн" кемесінің ұзындығы 228 метр, ені 37,8 метр, және ол 9500 стандартты автокөлік орнына ие.
Кемеде алдыңғы қатарлы энергия үнемдеу технологиялары мен интеллектуалды төмен көміртекті жүйелер интеграцияланған, бұл оны әлемдік деңгейдегі энергия тиімділігіне жеткізеді. Сонымен қатар, автомобиль тасымалдаушының құрылысында метанолмен жанармай құю мүмкіндігі қарастырылған, бұл болашақта кеменің көміртек бейтараптығына негіз қалады.
