Қытайдың «Чанъэ-5» ұшқышсыз ғарыш аппараты Айдың топырағын жинап, Жерге сәтті оралды, деп хабарлайды «Адырна» «Хабар 24»-ке сілтеме жасап.
Капсула Қытайдың солтүстігіндегі Ішкі Моңғолия автономиялық ауданындағы Хошун (әкімшілік бірлік) Сыцзыван аумағына қонды. Капсула Жерге шамамен 2 кг ай топырағын жеткізді. Чанъэ-5 зонды бастапқыда 2017 жылдың қараша айында іске қосылуы керек еді, бірақ 2017 жылдың шілдесінде Чанчжэн-5 зымыран тасығышының апатына байланысты миссия кейінге қалдырылды.
Қытайдың Айды зондтау бағдарламасы үш кезеңнен тұрады: Жер спутнигінің айналасында ұшу («Чанъэ-1» және «Чанъэ-2»), Айға қону («Чанъэ-3» және «Чанъэ-4») және Айдан Жерге оралу («Чанъэ-5» және «Чанъэ-6»). Бірінші және екінші кезеңдер аяқталды.
«Адырна» ұлттық порталы
