13 қараша күні Алматыда журналист, блогердің сотталғаны туралы ақпарат тарады, деп хабарлайды "Адырна" ұлттық порталы.
Медеу аудандық №2 соты белсенді, блогер Мирболат Мырзатайұлын ҚР Қылмыстық кодексінің 174-бабының 1-бөлігі бойынша кінәлі деп танып, 4 жылға бас бостандығынан айыру туралы үкім шығарды. Facebook әлеуметтік желісінде түрлі ақпараттар тарап жатыр.
"Қазір ғана журналист Мирболат Мырзатайұлы 4 жылға бас бостандығынан айрылды.
Оған Қылмыстық Кодекстің 174-ші бабының 1-ші бөлігі (ұлтараздықты қоздыру)бойынша айып тағылды.
Мирболаттың төрт баласы бар, оның екеуі кәмелеттік жасқа толмағандар.
Соңғы сәтке дейін шартты жазамен босатар деген үміт болды, бірақ үміт ақталмады.
Мирболат соңғы сөзінде: ”Мені соттау - қазақ тілін соттау”-деп қадап айтты", - деп жазды белсенді Абзал Достияр.
Еске салайық, 2 қыркүйекте блогердің туыстары оның жоғалып кеткенін айтып, әлеуметтік желілерде дабыл қаққан еді. Кейін белгілі болғандай, оны құқық қорғау органдары ұстаған.
Ал 3 қараша күні журналист желідегі парақшасында жарыс сөздің басталғанын жазды.
