Израиль Иран өз аумағына зымыранмен соққы жасайтын болса, әскери іс-қимылдарды қайта бастауға дайын, деп хабарлайды "Адырна" ұлттық порталы Report-қа сілтеп.
Бұл туралы Израильдің қорғаныс министрі Исраэль Кац мәлімдеді.
Министрдің айтуынша, әскери операциялардың қайта жандануы екі жағдайда мүмкін. Біріншісі – АҚШ президенті Дональд Трамп Тегеранмен жүргізіліп жатқан келіссөздерді нәтижесіз деп таныған жағдайда. Екіншісі – Иран Израиль аумағына зымыранмен шабуыл жасаған жағдайда.
«Егер Иран Израильге қарай зымыран ұшырса, Израиль күшпен жауап береді. Біз Иранның Израильге оқ атуына жол бермейміз. Бұл ұстаным АҚШ-қа да жеткізілді. Израиль қорғаныс армиясы толық жауынгерлік дайындықта, соққы беруге арналған нысандар анықталған», – деді Исраэль Кац.
Израиль билігі елдің қауіпсіздігін қамтамасыз ету мақсатында қарулы күштердің толық дайындық режимінде тұрғанын хабарлады.
